Iha reuniaun preparatória ne'ebé hala'o iha Salaun Magna MJDAK, iha pontu importante balun ne'ebé foti:

Valor Istóriku no Espirituál: Ministru Nelyo Isaac Sarmento fó hanoin kona-ba importánsia tema Jornada nian ne'ebé tenke liga ho memória istóriku hanesan Loron Restaurasaun Independénsia (20 Maiu) no Loron FALINTIL (20 Agostu).

Apoiu Estadu: "Koperasaun husi parte Estadu nian importante tebes. Vizaun husi Ministériu mak imi sei hetan, no buat seluk tan mós sei kontinua apoia," dehan Governante ne'e.

Partisipasaun Jerál: Prezidente Ezekutivu CNJCTL, Padre Fransisco Indra do Nascimento Tey Seran, informa katak Konferénsia Episkopál Timorense (CET) prepara hela prosesu organizativu ne'ebé sei envolve foin-sa'e sira husi Arkidiocese Dili, Diocese Baucau, no Diocese Maliana.

Jornada Mundiál iha Koreia: Aleinde eventu iha Remexio, CNJCTL mós koordena hela ho Kardeal no MJDAK kona-ba preparasaun ba Jornada Joventude Katólika Mundiál ne’ebé sei hala’o iha Koreia.

Iha enserramentu, Ministru Nelyo Isaac apela ba foin-sa'e mane no feto iha Timor-Leste atu partisipa ativamente iha Jornada Remexio nian nu'udar oportunidade hodi hametin karakter, espiritualidade, no responsabilidade sosiál.

Partisipa mós iha reuniaun ne'e, Diretór-Jerál Juventude no Xefe Departamentu sira ne'ebé relevante husi MJDAK.

#MJDAK #LensaMJDAK #JuventudeKatólika #CNJCTL #JornadaRemexio2026 #NelyoIsaacSarmento #TimorLeste

Ver menos