Brunei, 𝟎𝟓/𝟎𝟓/𝟐𝟎𝟐𝟔: Vise Primeiru Ministru, Ministru Koodenador Asuntu Sosiais, Eng. Mariano Assanami Sabino, hamutuk ho delegasaun vizita fatin prosesamentu Liquefied Natural Gas (LNG) Brunei iha Lumut, Belait, Brunei Darussalam.

Vizita estratéjiku ne’e hala’o iha ámbitu vizita ofisiál Primeiru-Ministru Kay Rala Xanana Gusmão nian ba Brunei Darussalam, ho objetivu prinsipál atu aprende direita husi esperiénsia susesu Brunei nian iha jestaun indústria LNG durante dékada 5 resin.

Fábrika jigante ne’ebé komesa operasaun iha tinan 1972 no jere husi Brunei LNG Sdn Bhd ne’e konsidera hanesan “xave” ba susesu ekonomia Brunei nian. Ho kapasidade produsaun boot, instalasaun ne’e okupa pozisaun da-haat boot liu iha Sudeste Aziátiku no fornese LNG ho kualidade aas ba merkadu sira hanesan Japaun no Korea Súl.

Fábrika ne’e simu fornesimentu gás naturál husi kampu mina iha tasi laran, ne’ebé opera husi Brunei Shell Petroleum (BSP), hodi transforma sai LNG liuhusi prosesu teknolójiku avansadu ba esportasaun.

Timor-Leste iha planu boot atu dezenvolve indústria LNG rasik iha kosta súl liu husi projetu Tasi Mane. Tan ne’e, esperiénsia Brunei nian sai referénsia importante tebes ba Timor Leste.

Liu husi vizita ne’e, Timor-Leste bele hametin liután relasaun bilaterál ho Brunei no loke dalan ba kooperasaun konkretu iha setór enerjia no investimentu ba futuru.

Vizita traballu ne’e partisipa husi Vse-Primeiru-Ministru Asuntu Ekonomiku Francisco Kalbuadi Lay, Ministru Negósius Estranjeirus no Kooperasaun Bendito Freitas, Ministru Petróleu no Rekursu Minerais Francisco Monteiro, no Ministra Saúde Elia Amaral