𝐁𝐫𝐮��𝐞𝐢 𝐃𝐚𝐫𝐮𝐬𝐬𝐚𝐥𝐚𝐦, 𝟎𝟒/𝟎𝟓/𝟐𝟎𝟐𝟔: Vise Primeiru Ministru, Ministru Assuntu Sociais, Eng. Mariano ASSANAMI Sabino, akompanha Xefe Governu Kay Rala Xanana Gusmao hala’o enkontru bilateral ho Sua Majestade Sultan Haji Hassanal Bolkiah Mu’izzaddin Waddaulah iha Istana Nurul Iman.

Enkontru ne’e parte husi Vizita ofisial, hodi atende konvite husi Sua Majestade Sultan Haji Hassanal Bolkiah hafoin Timor-Leste nia adezaun bá ASEAN nu’udár membru plenu bá dala-11 iha loron 26 fulan-Outubru tinan 2025.

“Ho haksolok tebes simu Primeiru-Ministru, Xanana Gusmão ne’ebé hili Brunei Darusssalam nu’udár nasaun ne’ebé nia vizita da-huluk hafoin adezaun bá ASEAN. Aproveita mós hato’o parabéns bá Governu no Povu Timor-Leste kona-bá marku ida-ne’e. Brunei Darussalam kompromete atu kontinua fó apoiu bá Timor-Leste iha nia preparasaun sira atu sai uma na’in bá Simeira ASEAN iha tinan 2029,” dehan Sua Majestade.

Iha Fatin Hanesan Xefe Guvernu hato’o agradesimentu sinseru husi Timor Leste bá Brunei Darussalam ne’ebé konsistente hodi apoia TL nia adezaun bá ASEAN. Tama bá ASEAN maka realizasaun bá aspirasaun nasionál ne'ebé iha kleur ona.

Nu’udár membru ASEAN, Timor-Leste komprometidu atu tane a’as Karta ASEAN no kontribui bá páz, estabilidade no prosperidade ne’ebé fahe iha rejiaun ne’e.

Hanesan parte ida hosi kompromisu ida-ne'e, TL iha intensaun atu assume Prezidénsia ASEAN nian iha 2029. TL hatene katak, ida-ne'e mak responsabilidade ida ne'ebé signifikativu no hahú ona preparasaun sira.

TL valoriza apoiu no kooperasaun ne'ebé fornese hosi Brunei Darussalam no sei servisu besik ho Majestade ninia Governu iha preparasaun sira molok realizasaun simeira ASEAN iha tinan 2029, ne’ebé TL rasik mak sei sai uma-na’in.

Hafoin enkontru, Sua Majestade ho Primeiru-Ministru assiste asinatura memorandu entendimentu tolu entre Governu rua ne'e.

Akordu sira kobre kooperasaun iha área enerjia, saúde no estabelesimentu hosi mekanizmu ida bá konsulta bilaterál sira.

Memorandu Entendimentu kona-bá Kooperasaun Enerjétika asina hosi Ministru iha Gabinete Primeiru-Ministru no Ministru Defeza II Pehin Datu Lailaraja Major Jenerál (Rtd) Dato Paduka Seri Awang Haji Halbi bin Haji Mohd Yussof no Timor-Leste nia Ministru Petróleu no Rekursu Minerál Francisco da Costa Monteiro.

Akordu kooperasaun saúde ne’e asina hosi Ministru Saúde Dato Seri Setia Dr Haji Mohammad Isham bin Haji Jaafar no Timor-Leste nia Ministra Saúde Élia António de Araújo dos Reis Amaral.

Memorandu konsulta bilaterál ne’e asina hosi Ministru Negósiu Estranjeiru II Dato Seri Setia Haji Erywan bin Pehin Datu Pekerma Jaya Haji Mohd. Yusof no Timor-Leste nia Ministru Negósiu Estranjeiru no Kooperasaun Bendito dos Santos Freitas.

Delegasaun ne'ebé partisipa kompostu hosi Vise Primeiru-Ministru, Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Vise Ministra Asuntu ASEAN, Milena Rangel, Sekretáriu Estadu Komunikasaun Sosiál, Expedito Ximenes, Embaixadór TL iha Brunei, Abel Guterres, Xefe Gabinete Primeiru-Ministru, Elizabeth Exposto, no Xefe Gabinete hosi Vise Primeiru-Ministru, Koordenadór Asuntu Ekonómiku no Ministru Turizmu no Ambiente, Catarina F. Borromeu Duarte Soares.