Díli, 09 Maiu 2026| 𝐒𝐮𝐚 𝐄𝐱𝐜𝐞̂𝐥𝐞𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬 𝐄𝐧𝐠. 𝐅𝐞𝐫𝐧𝐚𝐧𝐝𝐢𝐧𝐨 𝐕𝐢𝐞𝐢𝐫𝐚 𝐝𝐚 𝐂𝐨𝐬𝐭𝐚, 𝐒. 𝐇𝐮𝐭, Akompañia S.E. Prezidente da Repúblika Dr. José Ramos-Horta, hahú nia Vizita Estadu dahuluk ba Papua Nova Guiné husi loron 10 to'o loron 13 fulan-Maiu tinan 2026, hodi hametin relasaun entre nasaun rua ne'e no loke kapítulu estratéjiku ida iha sira-nia relasaun bilaterál.

Vizita ne’e koinside ho Simeira Inaugurál Oseanu Melanézia, ne’ebé organiza husi PNG iha APEC Haus ho tema “Asegura Protesaun Oseanu ho Ekonomia Oseanu Sustentável.”

Foku prinsipál ida husi vizita ne’e mak atu hametin kooperasaun entre Timor-Leste no Papua Nova Guiné—nasaun rua ne’ebé iha interese komún ne'ebé kle'an hanesan nasaun Melanézia no Triángulu Korál.

Bainhira to’o iha Port Moresby iha loron 10 fulan Maiu, S.E. Prezidente Repúblika Dr. José Ramos-Horta sei hahú nia programa ofisiál iha loron 11 fulan Maiu ho vizita kortezia ba Governadór Jerál Papua Nova Guiné, Sir Bob Bofeng Dadae, iha Government House.

Iha loron ne'e kedas, Prezidente sei hala'o enkontru bilateral ho Primeiru-Ministru Papua Nova Guiné, Hon. James Marape, iha Melanesian Haus. Líder na'in rua sei diskute kona-ba kolaborasaun prátika iha diplomasia rejionál, governasaun tasi nian, no reziliénsia ekonómika.

Tuirmai S.E. Prezidente Repúblika sei partisipa iha almosu Estadu ofrese husi Primeiru-Ministru no Governadór Jerál iha Hilton Hotel. Iha kalan, Prezidente sei sei partisipa iha Jantar Ofisiál ne’ebé ofrese husi Primeiru-Ministru Marape, hodi marka abertura ba Simeira Inaugurál Oseanu Melanézia nian, iha APEC Haus.

Iha loron 12 fulan-Maiu, Prezidente Ramos-Horta sei partisipa iha sesaun plenária Simeira Oseanu Melanézia nian iha APEC Haus, iha ne'ebé líder Melanéziu sira sei halo promesa protesaun oseânika nian ba objetivu biodiversidade globál 30x30 nian.

Prezidente sei hala'o mós enkontru bilaterál ho líder husi nasaun Illa Pasífiku sira seluk iha APEC Haus, tuir mai partisipa iha resepsaun koktel ida ne'ebé organiza husi Governadór Distritu Kapitál Nasionál, Hon. Powes Parkop.

Vizita ne’e reafirma Timor-Leste nia solidariedade ho nasaun melanézia sira kona-ba governasaun oseánika, peska sustentável, no konservasaun marinha nian.

“Timor-Leste bele joven iha nasionalidade, maibé ami antigu iha ami-nia respeitu ba tasi. Simeira Oseanu Melanézia nu’udar farol ba ambisaun koletiva. Timor-Leste hamriik hamutuk ho ita-boot sira—hodi proteje ita-nia patrimóniu azúl, atu asegura ita-nia povu nia moris, no atu garante katak Pasífiku nia fuan kontinua forte ba jerasaun barak sira tuir mai,” deklara S.E. Prezidente J. Ramos-Horta.

S.E.Prezidente J. Ramos-Horta sei konklui nia vizita Estadu dahuluk ba Port Moresby iha loron 13 fulan-Maiu, hafoin Serimónia despedida Guarda de Honra iha Aeroportu Internasionál Jacksons.