Díli, 11 Maiu 2026 — Sekretaria Estadu Kooperativas (SEKoop) liuhosi Diretór Jerál Olderico Lopes ofisialmente asina akordu koperasaun ho Kooperativa Multi-Sektorál Komunidade, Korenti, Karidade iha Timor (3K-T) ne’ebé reprezenta husi Prezidente Idelfonso Pinto, kona-ba sosa no fornese produtu bafo kayrala (sorghum) iha territóriu Timor-Leste tomak.

Akordu ida-ne’e nia objetivu mak atu fasilita sosa no uza bafo kayrala ba produsaun ai-han hanesan dosi, bolinhos no produtu prosesadu seluk ne’ebé sei distribui ba restaurante no loja sira iha rai laran. Alende ne’e, akordu mos atu apoia programa nasional sira inklui Programa Merenda Eskolar liuhosi uza produtu agríkola lokal.

SEKoop hatete katak koperasaun ida-ne’e importante tebes atu hametin sistema merkadu bazeia ba kooperativa no fó oportunidade ba agrikultór ki’ik sira atu asesu merkadu ho di’ak liu. Inisiativa ida-ne’e mos espera bele ajuda hametin seguransa ai-han nasional liuhosi promosaun produtu bafo kayrala.

Iha nia intervensaun, Arsénio Pereira da Silva agradese ba Kooperativa 3K-T tanba nia komitmentu atu servisu hamutuk ho Governu liuhosi SEKoop.

“Obrigadu ba Kooperativa 3K-T tanba servisu hamutuk ho Governu atu sosa produtu bafo kayrala. Akordu ida-ne’e kontribui ba programa Governu no mos motiva produtór sira atu hasa’e produzaun,” hatete Sekretáriu Estadu Kooperativas.

Nia mos hatutan katak durante ne’e barak mak preokupa kona-ba merkadu ba produtu bafo kayrala, maibé ho akordu ida-ne’e, komunidade no produtór sira bele hetan garantia merkadu ba sira nia produtu.

Iha parte seluk, Prezidente Kooperativa 3K-T, Idelfonso Pinto, fó agradesimentu ba lideransa SEKoop ne’ebé fó oportunidade ba kooperativa atu envolve iha programa Governu nian.

“Ami prontu atu servisu hamutuk ho Governu hodi sosa produtu bafo kayrala ne’ebé produs husi movimentu kooperativa no komunidade sira iha territóriu laran tomak. Ba faze dahuluk, ami planeia atu sosa hamutuk tonelada 120,” hatete nia.

Tuir dadus SEKoop nian, atualmente area plantasaun bafo kayrala to’o ona 189 hektare, no rezultadu kolleta dahuluk atinji besik tonelada 60, enkuantu parte seluk sei kontinua kolleta iha tempu oin mai.

Seremónia asina akordu ne’e marka prezensa husi GIA, Inspetór Gaspar Policarpo Correia, Xefe Gabinete Francisca L. de Araújo Simith, nomos diresaun, xefia no asesor sira SEKoop nian.

#Média SEKoop#

See less