𝟏𝟏 𝐌𝐚𝐢𝐮 𝟐𝟎𝟐𝟔

==========

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hala’o vizita traballu iha área Portu Tuan, Baía Díli, Segunda, 11 Maiu 2026, hodi observa diretamente fatin ne’ebé prepara ona atu sai nu’udar lokál konstrusaun ba Sentru Konvensaun Internasionál (International Convention Center).

Projetu ne’e tuir planu sei lansa fatuk dahuluk iha loron 20 Maiu 2026, hamutuk ho komemorasaun Loron Restaurasaun Independénsia ba dala-24 Timor-Leste nian. Projetu Sentru Konvensaun Internasionál sei sai nu’udar infraestrutura importante ida atu revitaliza kapital Díli, promove setór turizmu, dinamiza atividade ekonomia, no prepara Timor-Leste atu simu eventu internasionál sira iha futuru, inklui prezidénsia ASEAN iha tinan 2029.

Sentru Konvensaun Internasionál sei inklui fasilidade modernu sira hanesan sala konferénsia prinsipál, auditóriu, pavillaun espozisaun, akuáriu, paseiu tasi-ibun, no sentru entretenimentu no komérsiu ne’ebé sei kontribui ba dezenvolvimentu urbanizasaun no atividade turístika iha kapitál.

Tuir planu governu nian, konstrusaun Sentru Konvensaun Internasionál sei realiza durante períodu 2026 to’o 2028 no espera bele remata antes Timor-Leste simu responsabilidade nu’udar Prezidente ASEAN iha tinan 2029.

Rekorda fali katak, iha loron 24 Setembru 2025, Primeiru-Ministru (PM), Kay Rala Xanana Gusmão hamutuk ho ninia omólogu Malázia, Dato' Seri Anwar Ibrahim, inklui entidade governamentál no korpu diplomátiku sira lansa tiha ona ba públiku dezeñu ba projetu Sentru Konvensaun Internasionál iha Portu Tuan, Baía, Dili.

See less