𝐃Í𝐋𝐈-𝐒𝐞𝐱𝐭𝐚 𝟏𝟓 𝐌𝐚𝐢𝐮 𝟐𝟎𝟐𝟔,

Governu liuhusi S.E Primeiru Ministru Sr. Kay Rala Xanana Gusmão ho S.E Ministra Finansas Sra. Santina José Rodriges F. Viegas Cardoso, Akompaña husi S.E Vise-Ministra Finansas Sra. Regina de Jesus de Sousa, S.E Vise-Ministru Asuntu Parlamentár, Sr. Adérito Hugo da Costa, ofisialmente entrega Proposta lei Orsamentu Retifikativu ho montante millaun $192, ba S.E Prezidente Parlamentu Nasionál (PN) Sra. Maria Fernanda Lay.

Objetivu prinsipál husi orsamentu retifikativu ba programa haat, atu responde ba nesesidade urjente sira, inklui garantia stok mina iha rai laran atu prevene impaktu husi krize internasionál, liuliu situasaun iha Médiu Oriente ne’ebé afeta ba iha fornesimentu kombustível ba Timor-Leste.

Proposta lei ne’e inklui aumentu ba Orsamentu Jeral Estadu (OJE) 2026 hamutuk ho alterasaun orsamental ne’ebé aprova ona iha Konsellu Ministru ho montante millaun $177, ho alterasaun ne’ebé mak iha aumenta tan $ 15 milloens totál orsamentu retifikativu atinji millaun $192, kompara ho proposta anterior.

“Governu lori Proposta Lei Orsamentu Retifikativu mai entrega ba Prezidente Parlamentu Nasional, ho karakter urjensia”, hateten Xefe IX Governu Konstitusional.

Iha biban ne’e S.E Ministra Finansa Sra. Santina José Rodriges F. Viegas Cardoso, ba jornalista sira esplika finansiamentu ba proposta retifikativu ne’e mai husi ajustamentu interna iha liña ministerial sira nomós husi reseita doméstika, la’ós husi asesu ba Fundu Petrolíferu. Medida ida-ne’e halo atu asegura sustentabilidade fiskál no kontinua suporta programa prioritáriu Governu nian.

Governu mós hateten subsidiu no mekanizmu kontrolu presu sei kontinua implementa atu bele mantéin estabilidade presu mina no proteje povu husi aumentu kustu moris. Medida hirak ne’e importante atu asegura povu kontinua asesu ba béns no servisu baziku ho presu razoável.

Durante entrega dokumentu ne’e, Governu husu Parlamentu Nasionál atu konsidera proposta lei refere ho karáter urjénsia, atu bele diskute no aprova iha tempu badak hodi garante implementasaun programa prioritáriu sira.

#Foto #Ekipa #Media #Ministeriufinansas

Lihat Lebih Sedikit