Díli, 15 Maiu 2026 – Sekretáriu Estadu ba Formasaun Profesionál no Empregu (SEFOPE) Interinu, Eng. Arsénio Pereira da Silva, M.Agr., ne’ebé atualmente mós hala’o knaar hanesan Sekretáriu Estadu Kooperativas (SEKoop), asina deklarasaun ho traballador Timoroan hamutuk ema nain 20 antes sira partisipa ba servisu iha Kompañia Hortus, iha Nova Zelándia.

Haruka traballador sira ne’e realiza liu husi programa Recognized Seasonal Employer (RSE), ne’ebé durante ne’e sai hanesan mekanizmu importante ida hodi fó oportunidade empregu ba traballador Timoroan sira iha setor hortikultura no vitikultura iha Nova Zelándia.

Iha ninia intervensaun, SEFOPE Interinu hato’o agradese ba Governu Nova Zelándia no empregador sira tanba fó oportunidade ba Timoroan sira atu servisu no hetan esperiénsia iha rai-liur.

“Governu nia papél liu husi SEFOPE mak fasilita traballador Timoroan sira atu bele servisu iha nasaun parseiru dezenvolvimentu hanesan Nova Zelándia,” hateten Eng. Arsénio Pereira da Silva.

Nia mós husu ba traballador sira atu bainhira iha rai-liur, sira tenke hatudu disiplinu, étika servisu no kultura Timoroan ne’ebé di’ak, tanba sira reprezenta Timor-Leste no povu Timoroan tomak.

“Ba servisu ho di’ak, respeita ema hotu no hatudu ita-nia identidade nu’udar Timoroan ida ne’ebé responsavel,” hatutan nia.

Seremónia asinatura deklarasaun ne’e realiza ho prezensa husi Xefe Gabinete SEFOPE, Diretór Jerál Interinu, diresaun no xefia sira iha SEFOPE, inklui família traballador sira ne’ebé sei ba servisu iha Nova Zelándia.

Programa RSE kontinua sai prioridade ida ba Governu atu hasa’e oportunidade empregu no rendimento ba juventude no traballador Timoroan sira liu husi mobilidade laboral ho nasaun parseiru sira.

#Média SEKoop#

See less