DILI, 15 Maiu 2026 – SEFOPE (Secretaria Estadu Formasaun Profisionál no Empregu), liuhusi Diresaun Nasional Empregu Estranjeiru (DNEE), ho orgullu hala'o seremonia despedida ba traballador sira iha programa Pacific Australia Labour Mobility (PALM) nain 101 (feto 15, mane 86). Sira ne'e sei mobiliza ba servisu iha Australia hamutuk ho kompania lima husi indústria prosesamentu na'an no horikultura.

Seremonia ne'e sai parte importante hodi fó apoiu moral no orientasaun final ba traballador sira antes sira viajen ba rai seluk. Eventu ne'e hetan partisipasaun husi Sua Exelénsia Sekretáriu Estadu Kooperativa Sr. Arsénio Pereira da Silva (nu'udar Sekretáriu Estadu Formasaun Profisionál no Empregu Interinu), Segundu Sekretária Embaixada Australia Sr. Declan, Diretora Jeral Interina, Xefe Gabinete SEFOPE, no xefe departamentu sira, inklui Jestor PLMSP Sr. Geraldo Ximenes.

Iha diskursu, Sekretáriu Estadu SEFOPE Interinu hato'o mensajen xave no valiozu katak:

"Hau hodi SEFOPE nia naran husu ba traballador sira feto no mane atu simu oportunidade ida ne'e ho responsabilidade, hodi tane as interese Estadu no Nasaun. Ohin, ita boot sira asina deklarasaun hamutuk ho ita boot sira nia família no mos estadu, ne'e demonstra ita boot sira nia nasionálismu hodi sai sidadaun di'ak no herói foun hodi liberta Povu Timor-Leste husi kiak no mukit. Ita boot sira sei husik hela família no ami hotu hodi ba moris iha rai Australia, iha ambiente foun, iha sosiedade foun hanesan sakrifísiu ida atu kontribui ba dezenvolvimentu ita nia nasaun. Hau husu ba ita boot sira atu kumpri regras no prosedimentu sira ne'ebé iha, hodi labele halai sai husi sistema, hatudu dezempenu servisu no hahalok ne'ebé di'ak hodi bele loke dalan ba Timor-oan sira seluk ne'ebé hein hela oportunidade ida ne'e."

Aleinde diskursu husi SEFOPE, reprezentante Governu Australia mos hato'o agradese wain ba Governu Timor-Leste no parseiru implementador sira hotu ne'ebé realiza programa ida ne'e sai posível. Rekonhese katak jornada Timor-Leste iha programa PALM desde tinan 2012 la'os deit fó kontribuisaun ba ekonomia Timor-Leste, maibé ajuda mós hasa'e kresimentu ekonomia Australia liuhusi indústria sira. Australia iha komitmentu atu kontinua apoiu nafatin programa ida ne'e ba futuru.

Parabéns ba traballadores no família sira hotu! Deseju susesu boot iha imi nia jornada hamutuk ho programa PALM!