Díli, 27 Maiu 2026| 𝐒𝐮𝐚 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬 𝐄𝐧𝐠. 𝐅𝐞𝐫𝐧𝐚𝐧𝐝𝐢𝐧𝐨 𝐕𝐢𝐞𝐢𝐫𝐚 𝐝𝐚 𝐂𝐨𝐬𝐭𝐚, 𝐒.𝐇𝐮𝐭, Partisipa iha reuniaun konsellu ministrus extraordináriu ne’ebé mak lidera direta hosi S.E. Primeiru-Ministru (PM), Sr. Kay Rala Xanana Gusmão, iha salaun Ministériu Finansas, Ai-tarak Laran, Díli.

Sorumutuk ne'e ho karáker extraordináriu ne’e konta ho partisipasaun hosi membrus governu tomak, inklui diretóres jerais bá asuntu administrasaun no finansas ho diretóres aprovizionamentu nian hosi instituisoens estadu hotu-hotu.

Iha reuniuan ne’e, Konsellu Ministrus halo analiza pontu situasaun kona-ba ezekusaun orsamentál hosi departamentu governamentál sira no organizmu autónomu ida-idak, iha ámbitu Orsamentu Jerál Estadu ba tinan 2026 (OJE 2026), ne’ebé aprova hosi Lei n. 8/2025, loron 27 fulan-novembru.

Ezekusaun OJE 2026 atinje ona 30% hosi loron 1 fulan-janeiru to’o loron 26 fulan-maiu tinan 2026. Husi orsamentu totál (inklui seguransa sosiál), ne'ebé estabelese iha dolar amerikanu biliaun 2,445, maizumenus dolar amerikanu millaun 736 mak ezekuta ona to'o agora.

Iha sorumutu ne’e, analiza ona dezafiu prinsipál sira relasiona ho ezekusaun orsamentál, liuliu kona-ba aplikasaun Kódigu Aprovizionamentu no Kontratus Públikus foun, nune’e mós nesesidade no medida sira ne’ebé ho objetivu atu reforsa kapasidade ezekusaun programa no projetu sira ne’ebé prevee ona iha OJE 2026 nian. Aprezenta no analiza mós funsionamentu sistema informátiku aprovizionamentu nian.

Sorumutu ne’e hetan partisipasaun hosi membru Governu hotu-hotu, nune’e mós responsavel sira hosi institutu no organizmu sira ne’ebé integradu iha administrasaun indireta Estadu nian.