Objetivu husi atividade ida ne’e atu suporta trabalhadór retornu sira hodi bele halo investimentu sustentável ba skill profissional no rekursu finanseiru ne’ebé sira hetan ona durante servisu iha Austrália, iha momentu hanesan aumenta mos partisipantes hotu nia koñesimentu no konsiénsia kona-ba importánsia integra prinsípiu inkluzaun sosiál saude mental iha família no komunidade.

Fasilitadór sira iha sesaun ne’e kompostu husi Departamentu Reintegrassaun DNEE, IADE (fasilita sesaun Formasaun Jestaun Negósiu), SERVE IP (fasilita matéria Prosesu no Rekezitu kona-ba legalidade atividade negósiu), inklui PRADET no SEI (fasilita matéria kona-ba Kuidadu Saúde Mental no Inkluzaun Sosiál, Violensia Bazeia ba Jeneru, Igualidade Generu.

Atividade ida ne’e hetan partisipasaun direta husi Chefe Gabinete SEFOPE Sr. Jacinto Dias Ribeiro no Diretor Nasionál Empregu Estranjeiru, João Correia Pereira, iha ambitu abertura semináriu.

Alende aprezenta relatoriu husi Diretor DNEE, Durante diskursu Chefe Gabinete fo enfaze katak , “Ita boot sira hetan ona oportunidade diak tebes hodi ba servisu iha Austrália, no hetan ona kapasidade finanseiru no koñesimentu iha ita boot sira-nia área ida-idak. Governu Timor-Leste mós servisu hamutuk ho Embaixada Austrália, hetan mós ajuda hodi fo ba ita boot sira liu husi inisiativa Auto-empregu Espesial.” Chefe Gabinete mós enkoraja trabalhadór sira atu iha hanoin hodi loke negósiu ki’ik sira. “Governu iha esperansa boot katak iha futuru, ita boot sira la’ós de’it trabalhadór maibé tenki sai mós empregadór hodi ajuda Timor-oan sira seluk.