𝗗𝗶𝗹𝗶, 𝟮𝟳 𝗠𝗮𝗶𝘂 𝟮𝟬𝟮𝟲

Sorumutu estraordináriu Konsellu Ministrus ne'ebé lidera husi Primeiru-Ministru, Kay Rala Xanana Gusmão, análiza pontu situasaun kona-bá ezekusaun orsamentál husi departamentu governamentál sira no organizmu autónomu ida-idak, iha ámbitu Orsamentu Jerál Estadu bá tinan 2026 (OJE 2026), ne’ebé aprova husi Lei n. 8/2025, loron 27 fulan-novembru.

Sorumutu ne’e realiza iha sala Auditóriu Kay Rala Xanana Gusmão, iha Ministériu Finansas, kuarta-feira ne'e.

Hetan partisipasaun husi membru Governu hotu-hotu, nune’e mós responsavel sira husi institutu no organizmu sira ne’ebé integradu iha administrasaun indireta Estadu nian.

Ezekusaun OJE 2026 atinje ona 30% husi loron 1 fulan-janeiru to’o loron 26 fulan-maiu tinan 2026. Husi orsamentu totál (inklui seguransa sosiál), ne'ebé estabelese iha dolar amerikanu biliaun 2,445, maizumenus dolar amerikanu millaun 736 mak ezekuta ona to'o agora. Iha sorumutu ne’e, análiza ona dezafiu prinsipál sira relasiona ho ezekusaun orsamentál, liuliu kona-bá aplikasaun Kódigu Aprovizionamentu no Kontratus Públikus foun, nune’e mós nesesidade no medida sira ne’ebé ho objetivu atu reforsa kapasidade ezekusaun programa nomos projetu sira ne’ebé preve ona iha OJE 2026 nian.

Alende ne'e iha reuniaun aprezenta no analiza mós funsionamentu sistema informátiku aprovizionamentu nian.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*