Dili, 28 Maiu 2026

Ministru Transportes no Komunikasaun, Eng.Miguel Marques Gonçalves Manetelu partisipa iha debate no diskusaun bá orsamentu retifikativu iha plenária parlamentu nasionál.

Iha debate no diskusaun ne’e Parlamentu Nasionál (PN) aprova Orsamentu Retifikativu (OR) tinan 2026 iha faze jeneralidade ho votus a-favór 42, abstensaun 23 no kontra 0.

Primeiru-Ministru (PM), Kay Rala Xanana Gusmão lori Governu nia naran agradese bá bankada no komisarun sira ne’ebé simu ona pedidu husi Governu hodi halo desizaun sira ho karákter urjénsia. Agradese mós bá partisipasaun aberta, onesta, demokrátika husi deputadu sira no bainhira aprovadu Governu sei ezekuta ho seriedade.

Xefe Governu iha nia intervensaun destaka pontu importante sira entre medida prinsipál sira ne’ebé preve, destaka kriasaun rezerva estratéjika kombustível nasionál ida ho valór millaun $174,3, ho intensaun atu asegura maizumenus fulan hitu nesesidade nasionál bá kombustível bá produsaun eletrisidade no programa subsídiu bá kombustível ho valór millaun $42 hodi hamenus impaktu husi aumentu folin internasionál sira bá família nomos  negósiu sira.

Proposta sira ne’e inklui mós medida sira seguransa alimentár nian liuhusi reforsu estoke foos nian iha Sentru Lojístika Nasionál, rekrutamentu bá kadetes PNTL nian, despeza sira ne’ebé asosiadu ho Prezidénsia Pro Tempore CPLP nian no reforsu bá Rezerva Kontinjénsia Estadu nian.

Alterasaun ne’e, montante konsolidadu Orsamentu Estadu 2026 aumenta ho millaun $101,1, husi biliaun $2,291 bá biliaun $2,392. Aumentu ne’e la’ós rezulta husi aumentu transferénsia Fundu Petrolíferu maibé reajustamentu husi fonte finansiamentu sira, liuhusi utilizasaun saldu jestaun nian, saldu disponível iha konta bankária ne’ebé lá efetivu nomos reforsu husi reseita doméstika sira.

Aprovasaun jerál proposta ne'e muda bá diskusaun detalladu entre loron 29 fulan-Maiu no loron 2 fulan-Juñu, ne'ebé kulmina iha votasaun jerál finál bá alterasaun da-huluk bá Lei Númeru 8/2025 hosi loron 27 fulan-Novembru.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊