Manufahi, loron 14 fulan maio 2026- Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, akompaña husi Diretór Jerál Ensinu Sekundáriu Sr. Deolindo da Cruz, Diretór Nasionál Ensinu Sekundáriu Jerál Sr. Benjamin Fernandes da Cruz, Diretór Nasionál Ensinu Sekundáriu Tékniku Vokasionál Sr. Fernando Mouzinho Gama no Diretora Edukasaun Munisípiu Manufahi Sra. Juaninha da Silva Soares hala'o enkontru ho Diretora no Dirijente Eskola Sekundária Jerál 1912 Same kinta-feira ne’e.

Iha Enkontru ne'e Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hateten, ohin mai iha-ne'e atu esplika de'it ba profesór sira kona-ba prosesu andamentu sira liuliu eskola sekundáriu Jerál 1912 ne'ebé agora dadaun iha klase B rua iha Fahinehan no Babulo.

"Husu ba Diretór Eskola atu halo atendimentu hanesan husi klase A ba B tanba estudante hotu-hotu atu hetan edukasaun ne'ebé adekuadu ho kualidade di'ak, responsabilidade tomak ami entrega ba Dirijentes eskola 1912 hodi halo tratamentu hanesan, husi klase A nian ba klase B nune’e funsionamentu adminstrativamente la'o ho di'ak".

Governante ne’e mós husu ba Dirijente eskola 1912 atu partisipa ativu iha enkontru importante sira ne'ebé hala'o iha nivel Munisípiu, Postu Administrativu, to’o iha Suku laran, Liuhusi partisipasaun ne’e, eskola bele hametin kooperasaun ho autoridade lokál sira, Kordenasaun ne’ebé di’ak entre eskola no estrutura suku nian nune'e asegura katak serbisu edukasaun nian la'o ho di’ak no hetan apoiu husi komunidade tomak.

Eskola Sekundária Jerál 1912 iha sala de aula hamutuk 32, Profesór hamutuk 42, no estudante hamutuk 1. 200.

Hafoin halo enkontru ne'e Sua Exelénsia Sekretáriu Estadu ESJ-ESTV Sr. Domingos Lopes Lemos kontinua hala'o vizita hodi halo observasaun diretamente ba ekipamentu prátika sira eskola Sekundária Tékniku Vokasionál Akadiru hun Same.

#MédiaME