Dili, 01 Juñu 2026

Governu Timor-Leste liuhusi Ministériu Transportes no Komunikasaun (MTK) hamutuk ho Governu Kamboja liuhusi Ministériu Postais no Telekomunikasaun ក្រសួងប្រៃសណីយ៍ និងទូរគមនាគមន៍ - Ministry of Post and Telecommunications ofisialmente lansa ona plataforma nasionál foun verify.gov.tl. Lansamentu ne'e hanesan pasu boot ida bá transformasaun dijitál hodi hametin seguransa, transparénsia, nomos hapara falsifikasaun dokumentu ofisiál sira iha rai-laran.

Plataforma ne'e dezenvolve ho susesu boot liuhusi kooperasaun bilaterál no asisténsia téknika husi Governu Kamboja (bazeia bá sira-nia esperiénsia ho verify.gov.kh), ne'ebé uza teknolójia avansadu Blockchain ho kódigu QR.

Pontu Xave husi Plataforma Foun Ne'e :

• Fokus Primeiru bá Karta Kondusaun (SIM): Karta kondusaun sai hanesan dokumentu ofisiál dahuluk ne'ebé implementa kódigu QR Ho kódigu ne'e, autoridade sira (liuliu PNTL ho DNTT) ka sidadaun ruma bele scan uza telemóvel de'it hodi verifika kedas motorista nia identidade orijinál no deteta mós kualker dokumentu falsu.

• Seguransa Blockchain: Tanba uza baze blockchain, dadus sira-ne'e protejidu tebes. Só ministériu transportes no komunikasaun liuhusi diresaun nasionál transporte Terrestre maka kompetente no na'in bá dokumentu ne'e de'it mak bele asesu no verifika, hodi garante duni katak dokumentu ne'e orijinál no autentiku.

• Planu bá Oin: Governu iha ona vizaun katak kódigu QR no plataforma ne'e sei uja mós bá dokumentu importante sira seluk iha futuru.

Ministru Transportes no Komunikasaun, Eng.Miguel Marques Gonçalves Manetelu iha -nia entrevista bá jornalista sira hateten lansamentu Plataforma verify.gov.tl ne’e bele realiza tanba hetan apoiu husi governu kamboja.

“verify.gov.tl, Plataforma ida ne’ebé harii bazeia bá memorandum ne’ebé asina akordu iha 20 janeiru 2025 iha kamboja, iha marsu ekipa tékniku mai kedan halo asesmentu ida bá ita nia diresaun nasionál transportes terestre oinsá atu bele aplika uluk verify iha karta kondusaun, hahú husi marsu 2025 ne’e sira hahú servisu ne’e konklui kuaze iha novembru sira ne’e. Ohin mak ita iha oportunidade lansa Plataforma ida ne’e. Uza QR code ida bá karta kondusaun depois dokumentus ne’e atu asegura nia orijinalidade, seguransa depois ema ida kaer karta kondusaun ne’e. Dalaruma bele falsu mais iha ne’e QR code iha polisia ruma prende mak nia uza telephone no uja QR code nia bele iha informasaun ema ne’e los ka lae nia mak nain bá karta kondusaun ne’e ka lae. Bá oin karta kondusaun ne’ebé data mate ona ka expire sei troka hotu uza karta kondusaun foun ho QR code. Kualker karta kondusaun bá oin atu provizóriu ka permanente iha ona QR Code, atu asegura katak karta kondusaun ne’e ema nain duni mak kaer karta kondusaun ne’e bá oin sei aplika dokumentu sira seluk" dehan Ministru Manetelu bá jornalista sira iha salaun multiuzo GMN Bebora Dili.

Nune’e mós tuir Ministru Postais no Telekomunikasaun, Chea Vandeth iha nia entrevista bá jornaslista sira nia esplika Plataforma ida ne’e úniku tebes nune’e sira koopera ho tékniku sira husi kamboja hodi harii Plataforma ida ne’e.

“Antes ne’e ami harii Plataforma ida ne’e laiha dadus, ami foti dadus sira husi ministériu transportes no komunikasaun sira nia servidór (serve) no ikus mai finaliza Plataforma ida ne’e, bainhira nain bá karta kondusaun ka induvidu sira hakarak hatene uza sira nia dadus rasik, sira bele verifika liuhusi Plataforma ida ne’e ho nune’e dadus sira ne’e mak sai dokumentu ida bá sira” dehan Ministru Postais no Telekomunikasaun, Chea Vandeth bá jornalista sira iha salaun multiuzu GMN Bebora Dili.

Nia afirma laiha ema ida maka bele haree dadus eseptu ministériu transportes no komunikasaun liuhusi diresaun nasionál transporte Terrestre (DNTT), plataforma ida-ne’e aplika iha Kamboja mós. Plataforma blockchain ida-ne'e útil tebes atu asegura katak dokumentu hotu-hotu auténtiku. Plataforma ne’e hetan rekoñesimentu husi Ministru Dijitál ASEAN plataforma ida-ne'e mós rekoñese iha mundu tomak.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊