Dili, 01 Juñu 2026

Ministru Transportes no Komunikasaun, Eng.Miguel Marques Gonçalves Manetelu akompaña Vise-Primeiru-Ministru, Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay, simu delegasaun ida husi Reinu Kamboja iha enkontru kortezia ne'ebé hala’o iha Gabinete Vise-PM, Farol, Díli.

Delegasaun Kamboja ne’e kompostu husi Ministru Postais no Telekomunikasaun, Dr.Chea Vandeth, Sekretáriu Estadu Ministériu Postais no Telekomunikasaun, Haksokheng, Sekretáriu Jerál DGC, Chea Sereyvath, Diretór Jerál MPTC, Sam Sethserey no Embaixadór Extraordináriu nomos Plenipotensiáriu Reinu Kamboja nian bá Timor-Leste, CHUN Sovannarith.

Iha enkontru ne’e Timor-Leste no Kamboja, diskute oportunidade sira atu hametin relasaun amizade no kooperasaun iha área ekonomia, transporte, ligasaun aérea, turizmu, komersiu no investimentu. Delegasaun Kamboja mós fahe esperiénsia kona-bá dezenvolvimentu setór estratéjiku sira ne'ebé kontribui bá kreximentu ekonómiku.

Vise-PM, Dato’ Seri Francisco Kalbuadi Lay subliña vizita delegasaun Kamboja nian ne’e importante tebes atu reforsa relasaun bilaterál entre nasaun rua ne’ebé iha ona amizade ne’ebé metin.

“Ministru Postais no Komunikasaun Kamboja nian mai vizita Timor-Leste atu haree no hametin kooperasaun, liu-liu iha área dijitál. Ha’u kongratula bá Ministériu Transporte no Komunikasaun tanba konsege ona pasu ida bá oin liu-liu iha área dijitál. Ida-ne’e hatudu katak Timor-Leste la’o bá oin iha área transformasaun dijitál. Ne’ebé agora hotu-hotu kaer kareta ka motor karik imi iha ona karta kondusaun ida ho sistema dijitál nune’e mós rejistu bá kareta,” dehan Vise-Primeiru-Ministru.

Nia afirma relasaun entre Timor-Leste no Kamboja sai espesiál tanba ligasaun amizade ne’ebé di’ak entre líder sira husi nasaun rua.

“Timor-Leste no Kamboja iha relasaun ne’ebé di’ak tebtebes. Eis Primeiru-Ministru, Hun Sen mak belun di’ak bá Prezidente Repúblika Maun José Ramos-Horta no Primeiru-Ministru Maun Bo’ot Kay Rala Xanana Gusmão. Tanba ne’e, Kamboja kontinua fó apoiu bá Timor-Leste, liu-liu iha área téknika no kapasitasaun,” Hateten V-PM.

Vise-Primeiru-Ministru akresenta katak kooperasaun entre nasaun rua sei kontinua bá oin bá setór importante seluk, inklui edukasaun no dijitalizasaun.

Enkuantu Ministru Postais no Telekomunikasaun, Dr.Chea Vandeth, delegasaun tuir planu sei hasoru malu ho Ministra Edukasaun, Dulçe de Jesus hodi haree bá área saida de’it mak Kamboja bele ajuda Timor-Leste, liu-liu iha dezenvolvimentu teknolójia no dijitalizasaun iha setór edukasaun.

https://sdi.gov.tl/ministerio/presrealease/create 

𝐌𝐞́𝐝𝐢𝐚 𝐌𝐓𝐊