Ataúro, 04 Juñu 2026

Vise-Primeiru Ministru Interinu, Ministru Koordenadór Asuntu Ekonómia, no Ministru Turizmu no Ambiente atúal Ministru Transportes no Komunikasaun, Eng.Miguel Marques Gonçalves Manetelu kinta ohin desloka bá Ataúro hodi partisipa serimónia loron nasionál tasi ne’ebé sei hala’o iha 5 juñu 2026 iha Ataúro.

Iha Ataúro V-PM interinu ho kometiva simu husi Prezidente autoridade Munisípiu Ataúro, Mateus Belo, hodi kontinua hala’o enkontru iha salaun administrasaun Ataúro.

Iha enkontru ne’e Prezidente autoridade Munisípiu Ataúro, Mateus Belo, agradese bá Ministru Manetelu nia lideransa operasaun Roo Nakroma Dili – Ataúro husi tersa to’o domingu.

“Ha’u lori povu ataúro sente haksolok tebes iha Sua Esélensia nia mandatu kuaze loro-loron Roo Berlin Nakroma bele bá mai ataúro. Uluk roo bá mai ataúro iha loron sabadu no domingu de’it, dala de’it, bainhira laiha pasajeiru roo labele halo operasaun. Maibé agóra sabadu no domingu mós pasajeiru nakonu, loro-loron roo bá mai pasajeiru sempre nakonu ida ne’e susesu boot ida. Movimentu roo loro-loron komunidade sira bele iha opsaun bele bá iha tersa mós bele, kuarta mós bele, kinta mós bele, sesta mós bele, sabadu mós bele no domingu mós bele” dehan PAM Atúro Mateus Belo iha nia diskursu.

Nia Agradese bá governu da-sia lideradu Primeiru-Ministru Kay Rala Xanana Gusmão nia lideransa foti asaun ne’ebé risku ne’ebé boot maibé barani lao bá oin.

Ministru Manetelu iha nia diskursu hateten ohin loron ataúro iha mudansa boot Roo Berlin Nakroma nia operasaun Tersa to’o Sabadu turista mak vizita ataúro.

“Governu da-sia lideradu husi maun boot Primeiru-Ministru, Kay Rala Xanana Gusmão iha kompremisiu boot bá povu no rai doben ida ne’e, ita koko atu labele husik suku ida ka aldeia ida hela iha kotuk setór hotu-hotu ita book, balu foin hahú hanesan Estrada, eletresidade no seluk tan, esforsu ita halo tanba inspira husi maun boot Kay Rala Xanana Gusmão, ataúro laos fatin foun ida bá ema Ataúro oan, tempu japonese, portugés mai to’o iha okupasaun indonézia ema husi rai seluk rai boot sira, mai iha ne’e tanba destera kauza ida.

Governante ne'e afirma relasiona ho operasaun Roo Berlin Nakroma governu liuhusi Ministériu Transportes no Komunikasaun, sei halo hela estúdu viabilidade bá iha portu Ataúro.

"Los duni prezidente kuandu primeiru FEDA ataúro nia iha osan ida atu haree bá portu ataúro, ha’u dehan labele osan trezentos mil ne’e imi identifika bele halo eskola, bele hadia sentru saúde ka ida portu ne’e husik hela, ita tenke hadia duni, ohin ha’u hatudu foto ida sira uja satelit foto iha portu nia oin ne’e iha korál iha ne’ebá, tanba ne’e mak ita atu halo estudu viabilidade ne’e para atu haree portu ne’e mantein iha ne’ebá ka atu dudu oituan mai fali liman los, para atu asegura ida ne’e de’it, maibé fiar bá estudu viabilidade sei hahú agóra prosesu atu tama bá faze finál atu asina kontratu prosesu lao iha komisaun nasionál aprovizionamentu (CNA) ha'u fiar katak buat hotu lao di’ak, antes tinan ne’e remata estudu ne’e remata ita karik bele hahú konstruksaun iha 2027 ne’e kala ida ne’e imi pasensia oituan" Ministru Manetelu afirma.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊