𝟐 𝐉𝐮ñ𝐮 𝟐𝟎𝟐𝟔

==========

Governu Timor-Leste, liuhusi Ministériu Turizmu no Ambiente, sei selebra Loron Nasionál Tasi iha loron 5 Juñu 2026 ho objetivu atu valoriza Tasi hanesan patrimóniu nasionál, fonte moris ba komunidade kosteira sira no pilár importante ida ba dezenvolvimentu sustentável no ekonomia azul iha rai-laran.

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, liuhusi konferénsia ba imprensa ne’ebé hala’o iha Sentru Konvensaun Díli, Tersa, 02 Juñu 2026, haktuir, selebrasaun ne'e sai oportunidade atu hametin konsiénsia kolektiva kona-ba importánsia tasi ba moris povu timoroan no atu reafirma responsabilidade hamutuk hodi proteje no prezerva rekursu mariñu sira ba benefísiu jerasaun agora no jerasaun sira tuir mai. Tasi la'ós deit fonte ai-han no rendimentu ekonómiku, maibé mós parte integrante husi identidade kulturál no istória povu Timor-Leste nian.

“Dia 5 de junho Timor-Leste selebra Loron Nasionál Tasi, okaziaun ida neʼebé dedika ba valorizasaun Tasi hanesan patrimóniu nasionál, fonte moris ba komunidade sira iha área kosteira no elementu importante ba dezenvolvimentu sustentável iha ita-nia rai-laran. Tasi maka parte importante ida husi identidade kulturál povu timor-oan no patrimóniu ida ne'ebé tenke rai no proteje ba jerasaun sira tuir mai.

Loron Nasionál Tasi fó hanoin mai ita hotu kona-ba responsabilidade hamutuk atu proteje ita-nia Tasi, promove prátika peska sustentável no garante konservasaun ekosistema mariñu sira ne'ebé sustenta moris no dezenvolvimentu ba ita-nia Nasaun.

Em nome do Governu, Ha'u reafirma fila-fali kompromisu atu implementa polítika no Planu de Asaun ba Promosaun Ekonomia Tasi ne'ebé reziliente no sustentável iha ita-nia Rai doben, hanesan mós prioridade ba protesaun ambientál, kombate poluisaun iha Tasi no jestaun sustentável ba rekursus sira husi Tasi no iha área kosteira. Governu mós rekoñese esforsu komunidade lokál sira, organizasaun sosiedade sivíl, parseiru dezenvolvimentu no instituisaun públika sira ne'ebé kontribui ba prezervasaun Tasi Timor-Leste nian.

Atividade sira iha Loron Nasionál Tasi inklui kampaña sensibilizasaun ambientál, atividade limpeza tasi, Caravana Oseanu no programa edukativu ba juventude no inisiativa sira atu promove ekonomia azul sustentável, ne'ebé lidera husi Sua Exselénsia Primeiru-Ministru no Gabinete Fronteiras Terrestres e Marítimas, Ministério da Agircultura, Pescas e Florestas, Ministério da Educação, Ministério do Comércio e Indústria, Ministériu dos Transportes e Comunicação, PNTL, Turismo no Ambiente, Sekretaria Esstadu Komunikasaun Sosiál, iha Munisípiu Díli, Lautém, Postu Ataúro no Munisípiu sira seluk.

Nune'e nu’udar Vise-Primeiru Ministru husu partisipasaun ativa husi sidadaun hotu-hotu atu proteje ambiente mariñu, konservasaun Tasi no Oseanu sira maka responsabilidade hamutuk ida ne'ebé presiza kooperasaun entre Governu, setór privadu, komunidade sira no parseiru internasionál sira,”afirma Vise-PM iha mensajen ofisiál ba selebrasaun Loron Nasionál Tasi no Loron Mundiál Oseanu.

Karavana Oseanu sei hala’o abertura husi Primeiru-Ministru, Kay Rala Xanana Gusmão, ne’ebé hahú tuku 7 dadér husi Ministériu Negósiu Estranjeiru no Kooperasaun, Praia dos Coqueiros, no sei remata iha Largo Lesidere, Díli iha loron 5 Juñu 2026.

Partisipante ne’ebé sei partisipa iha Karavana Oseanu ne’e hamutuk grupu 43 no sei envolve husi munisípiu sira hotu iha teritóriu nasionál. Loron Nasionál Tasi ne’e sei selebra iha tinan-tinan.

See less