𝟎𝟐 𝐉𝐮𝐧̃𝐮 𝟐𝟎𝟐𝟔

==========

Parlamentu Nasionál (PN), liuhosi Sesaun Plenária, aprova ona Proposta Lei nú. 31/VI (3ª), alterasaun dahuluk ba Lei nú. 8/2025 kona-ba Orsamentu Jerál Estadu (OJE) ba Tinan 2026 (Orsamentu Retifikativu 2026). Proposta ne’e pasa iha votasaun finál globál ho votu a favór 42, kontra 0 no abstensaun 23, iha loron Tersa, 2 Juñu 2026.

Sesaun plenária ne’e prezide hosi Prezidente Parlamentu Nasionál, Maria Fernanda Lay, ho akompañamentu hosi membru Meza sira, deputadu sira no prezensa Primeiru-Ministru, Kay Rala Xanana Gusmão, hamutuk ho membru Governu sira.

Iha nia intervensaun ikus, Primeiru-Ministru agradese ba deputadu sira ne’ebé durante loron hirak nia laran partisipa iha debate kona-bá Orsamentu Retifikativu ne’e. Nia destaka katak diskusaun no kritika sira ne’ebé hamosu iha Parlamentu sai kontribuisaun importante ba hadi’ak servisu Governu nian.

“Ita diskute malu iha Parlamentu, maibé ida ne'e mak demokrasia fó hanoin ba malu,” hateten PM Xanana.

Iha okaziaun ne’e mós, bankada parlamentár sira hato’o deklarasaun votu hodi esplika sira-nia pozisaun kona-bá proposta alterasaun orsamentál ne’e.

Tuir aprovasaun iha finál globál, Komisaun C trata asuntu Finansa Públika sei prepara testu finál antes Parlamentu Nasionál haruka ba Prezidente Repúblika hodi promulga.

Orsamentu Retifikativu ne’e ho montante US$192 millaun, ne’ebé Governu konsidera nesesáriu atu responde ba impaktu hosi konflitu iha Médiu Oriente no atu hametin preparasaun nasaun nian hasoru risku sira ne’ebé bele mosu.

Governu identifika medida prioritária hitu, inklui sosa kombustível ba rezerva nasionál, fó subsídiu kombustível, reforsa seguransa alimentár, rekruta kadete PNTL foun hamutuk ema 400, suporta despeza relasiona ho Prezidénsia CPLP, reforsa kapasidade administrativa no operasionál RAEOA, no aumenta rezerva kontinjénsia Estadu nian.

See less