𝟓 𝐉𝐮ñ𝐮 𝟐𝟎𝟐𝟔

==========

Governu Timor-Leste organiza desfile no karavana nasionál ba selebrasaun Loron Nasionál Tasi ho objetivu hasa'e konsiénsia públika kona-bá importánsia protesaun ambiente, biodiversidade mariñu no sustentabilidade rekursu tasi nian.

Desfile no karavana nasionál ne’e hala’o iha Sesta, 5 Juñu 2026, ne’ebé hahú hosi Praia dos Coqueiros to’o remata iha Largo, Lesidere, Díli, ne’ebé envolve diretamente husi grupu 43 hosi teritóriu nasionál.

Tema ba selebrasaun Loron Nasionál Tasi mak: “Promove no proteje Tasi liuhusi Tara Bandu ba futuru ne’ebé sustentavel.”

Atividade ne'e envolve entidade governamentál sira, parseiru dezenvolvimentu, estudante, organizasaun komunidade no sidadaun sira husi área oioin. Liuhosi desfile, karavana no kampaña edukativa sira, partisipante sira hato'o mensajen forte kona-bá nesesidade atu proteje tasi, reduz poluisaun, kombate lixu plástiku no prezerva ekosistema mariñu ba benefísiu jerasaun agora no futuru.

Loron Nasionál Tasi sai momentu importante ida atu reafirma katak tasi la'ós deit fonte alimentasaun no rendimentu ekonómiku, maibé patrimóniu naturál ne'ebé iha valór bo’ot ba moris povu Timor-Leste. Ho poténsia marítima ne'ebé luan, rai ida ne'e kontinua promove prinsípiu ekonomia azul hanesan dalan atu asegura dezenvolvimentu sustentável ne'ebé balansa entre kreximentu ekonómiku no konservasaun ambientál.

Durante serimónia ne'e, partisipante sira mos hato'o apelu ba komunidade atu evita destrói rikusoin mariñu sira, proteje balada no rekursu naturál sira, no promove prátika sira ne'ebé responsável iha utilizasaun rekursu tasi nian. Konsiénsia kolektiva no partisipasaun ativu husi ema hotu konsidera importante atu garante tasi ne'ebé saudável, produtivu no sustentável.

𝐏𝐌 𝐗𝐚𝐧𝐚𝐧𝐚 𝐡𝐮𝐬𝐮 𝐤𝐨𝐦𝐮𝐧𝐢𝐝𝐚𝐝𝐞 𝐚𝐭𝐮 𝐩𝐫𝐨𝐭𝐞𝐣𝐞 𝐓𝐚𝐬𝐢 𝐧𝐨 𝐛𝐢𝐨𝐝𝐢𝐯𝐞𝐫𝐬𝐢𝐝𝐚𝐝𝐞 𝐦𝐚𝐫𝐢ñ𝐚

Primeiru-Ministru (PM), Kay Rala Xanana Gusmão, iha nia diskurusu hatete, liuhosi selebrasaun Loron Nasionál Tasi 2026 reafirma kompromisu nasaun nian atu proteje rikeza marítima Timor-Leste no husik legadu ambientál ne'ebé sustentável ba jerasaun sira tuir mai.

“5 de junho nu’udar Loron Nasionál Tasi. Tasi ne’e mak liga mundu tomak, tanba ne’e Tasi importante tebes. Ikus ne’e ho mudansa klimátika, ita tenke kuidadu ita-nia tasi. Ba joven sira ha’u kompriende hadomi netik imi-nia rai ne’e ba, husu xefe aldeia, xefe suku sira haree foer sira hodi labele estraga tasi. Biodiversidade iha ita-nia rai mós barak tanba ne’e ita tenke proteje, nune’e mak Governu iha hanoin hodi ko’alia kona-bá politika ekonomia azul,”deklara PM Xanana.

Atividade ne'e organizadu hosi Gabinete Fronteira Marítima no Terrestre no Ministériu Turizmu no Ambiente-Diresaun Jerál Turizmu.

Remata karavana, programa kontinua ho abertura Feira Oseanu iha Lesidere, ne’ebé sei hala’o durante loron tolu ho partisipasaun hosi instituisaun governamentál, parseiru dezenvolvimentu, setór privadu no komunidade sira.

Semana Nasionál Oseanu 2026 hala’o hosi loron 3 to’o 8 Juñu iha Díli, Ataúro, Lautém no munisípiu sira seluk, ho atividade edukativa, ambientál, kulturál no ekonomia azul atu promove utilizasaun bá rekursu tasi nian.

Iha atividade karavana nasionál ne'e Governu mós fahe prémiu ba manán na'in sira.

Partisipa iha selebrasaun ne'e mak Prezidente Repúblika, José Ramos-Horta, Primeiru-Ministru, Kay Rala Xanana Gusmão, membru Governu sira, parseiru dezenvolvimentu, estudante no komunidade sira.

See less