𝘿í𝙡𝙞, 01 𝙈𝙖𝙞𝙪 2026 – Diretor Jerál Indústria, Sr. Jorge Ferreira, hamutuk ho Diretora Nasionál Manufatureira, Sra. Odete Bello, hala’o enkontru ho ekipa JICA Timor-Leste hodi diskute implementasaun projetu apoiu ba Micro, Pequena no Média Empreza (MPME).

Objetivu hosi enkontru ne’e hodi kontinua diskusaun kona-ba koperasaun entre MCI, liu husi Direção Jerál Indústria, ho JICA Timor-Leste, hodi prepara no implementa projetu sira ne’ebé fó apoiu ba MPME sira. Fokus mak iha área dezenvolvimentu kapasidade, formasaun força traballu, no haforsa sustentabilidade negósiu sira iha Timor-Leste.

Iha enkontru ne’e, parte sira troka hanoin kona-ba oportunidade no mekanizmu apoiu ba grupu MPME, ne’ebé sai hanesan setor importante ba kresimentu ekonomia nasional. JICA hatudu nia interese atu kontinua fó apoiu liu husi atividade formasaun, kapasitasaun no dezenvolvimentu rekursu umanu.

Diskusaun mos fó atensaun ba importánsia hodi hadi’a kapasidade força traballu no hametin parseria téknika entre MCI no JICA, hodi garante implementasaun efetivu ba projetu sira ne’ebé sei benefisia emprezáriu no komunidade sira iha Timor-Leste.

Ministériu Komérsiu no Indústria apresia tebes apoiu no koperasaun diak ne’ebé estabelese ona ho JICA Timor-Leste, no espera katak relasaun ne’e bele kontinua hametin atu realiza programa no projetu sira ne’ebé kontribui ba dezenvolvimentu setor indústria no MPME iha rai laran.

Enkontru remata ho komprimisu husi parte rua atu kontinua servisu hamutuk no acelera preparasaun ba implementasaun atividade no projetu sira ne’ebé planeia ona.

Media MCI

See less