Dili, 2 Juñu 2026 - Diretór Jerál Komérsiu, Elias de Jesus Fátima, reprezenta Ministériu Komérsiu no Indústria (MCI), hamutuk ho reprezentante sira hosi United Kingdom Office for Product Safety and Standards (OPSS), Sra. Zoe Dayan no Sra. Sari Seruni hamutuk ho liña ministeriais no parseiru dezenvolvimentun sira, hala’o enkontru kona-ba kooperasaun United Kingdom (UK) ho Timor-Leste ba programa Kick-Off 2026 – 2028, iha Sala Diresaun Jerál komérsiu MCI, Fomentu Mandarin Dili.

Programa Integrasaun Ekonómika ASEAN-UK ne’e sei fó oportunidade signifikativu ida ba Timor-Leste bainhira nasaun ne’e avansa nia integrasaun ba ASEAN hafoin Timor-Leste nia adezaun nu’udar membru ASEAN iha 2025. Programa Kick-Off 2026 – 2028 ne’e apoia Timor-Leste hodi reforma regulatóriu, hasa'e integrasaun ekonómika, hadi'a kualidade regulatóriu, no hamenus bareira sira ba komérsiu no investimentu. Inisiativa ne’e mosu iha momentu krítiku ida tanba Timor-Leste kontinua esforsu hodi rezolve dezafiu regulatóriu sira no hametin governasaun hodi hadi’a ambiente negósiu, efisiénsia merkadu, no investimentu estranjeiru.

Durante programa nia faze inisiál, instituisaun governu nian, parseiru dezenvolvimentu sira, setór privadu, akademia, no sosiedade sivíl sei serbisu hamutuk hodi identifika prioridade sira, koordena parte interesada sira, no dezenvolve roteiru ida ba implementasaun hodi apoia Timor-Leste nia ajenda reforma regulatóriu no prosesu integrasaun ASEAN nian.

𝙈é𝙙𝙞𝙖 𝙈𝘾𝙄

See less