Dili, 08 Juñu 2026

Antes halo inspesaun bá lokál konstrusaun Segunda ne’e Ministru Transportes no Komunikasaun, Eng.Miguel Marques Gonçalves Manetelu, konvoka reuniaun alargada ida ho PU, PMC, ANATL no Kompañia konstruktór bá temporary Power house hodi hetan esplikasaun kona-bá progresu no dezafius ne’ebé hetan hasoru iha terrenu.

Atualmente konstrusaun “power house” temporária la’o hela. Fasilidades refere konstrui hodi mentein fornesimentu eletrisidade bá fasilidades ezistenti sira maka hanesan: Terminál Pasajeirus, Torre Kontrólu, fasilidades iha airside, labele deskonekta tanba operasaun aeroportu kontinua opera no área lokalizasaun power house ezistenti tengke entrega bá implementasaun projetu Terminál Pasajeirus foun molok konstrusaun “power house” permanente konklui no prontu hodi fornese eletrisidade bá fasilidades hotu-hotu iha Aeroportu Internasionál Prezidente Nicolau Lobato.

Aleinde ne’e mós ANATL-EP atualiza mós fatin parajen bá aviaun aero Dili. Konstrusaun foun parallel taxiway fizikamente sei impaktu bá fatin parajen Aviaun Aero Dili iha apron bravo ho konsiderasaun tempu no finansiamentu hodi solusiona relokasaun fatin parajem Aviaun Aero Dili temporariamente iha área seluk. ANATL, E. P. hala’o koordenasaun ona ho parte tékniku husi Aero Dili no aprezenta “layout” fatin parajem temporária iha apron existenti (apron Delta) ne’ebé maka sei nafatin asegura movimentu operasaun aviaun refere.

Nune’e, relokasaun fatin parajem Aero Dili husi fatin existenti bá fatin temporária sei realiza iha tempu badak hodi kontinua entrega (handover) área refere bá kontinuasaun projetu fíziku.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊