𝐃Í𝐋𝐈-𝟐𝟗 𝐌𝐚𝐢𝐮 𝟐𝟎𝟐𝟔,

Ministériu Finansas, liuhusi Sua Exelénsia Vise-Ministra Finansas, Sra. Regina de Jesus de Sousa, hala'o enkontru virtual ho Presidente ASEAN Federation of Accountants (AFA), Sr. Ardan Adiperdana, no nia ekipa, atu diskute progresu reforma sistema kontabilistika iha Timor-Leste no oportunidade parseria iha prosesu estabelesimentu Profeasional Accountancy Organization (PAO) iha país.

Iha enkontru ne'ebé realiza liuhusi plataforma Zoom, Vise-Ministra Finansas hato'o progresu importante sira ne'ebé Ministériu Finansas atinji ona iha área reforma sistema kontabilistika. Entre progresu hirak-ne'e mak konkluzaun esbosu padraun kontabilidade ba setór públiku no setór privadu, no preparasaun esbosu Dekretu-Lei ba estabelesimentu Professional Accountancy Organization (PAO), ne'ebé iha tempu besik sei submete ba Konsellu Ministrus atu hetan apresiasaun.

Aleinde ne'e, Ministériu Finansas mos hahu ona dezenvolve kapasidade rekursu umanu iha área kontabilidade liuhusi programa formasaun espesializada hanesan Chartered Accountant (CA), Certified Government Accounting (CGA), no oportunidade bolsa estudu iha área kontabilidade. Inisiativa sira-ne'e hetan apoiu husi Governu Indonézia liuhusi Indonesian AID (LDKPI), bazeia ba akordu doasaun entre nasaun rua ba períodu 2023–2027.

Durante enkontru, Vise-Ministra Finansas husu AFA atu konsidera fornese asisténsia téknika no formasaun relevante sira atu apoia prosesu establesimentu PAO iha Timor-Leste, nomós fasilita dalan atu organizasaun ne'ebé sei estabelese bele integra ba ASEAN Federation of Accountants (AFA) no International Federation of Accountants (IFAC).

Iha nia intervensaun, Presidente AFA, Sr. Ardan Adiperdana, hato'o apresiasaun ba Ministériu Finansas ba inisiativa ne'ebé daudaun hala'o no reafirma komitmentu AFA atu apoia Timor-Leste iha dezenvolvimentu profisaun kontabilidade. Nia hatete katak AFA prontu atu fornese asisténsia téknika, formasaun no kapasitasaun rekursu umanu atu apoia estabelesimentu PAO no forma espesialista kontabilidade ho padraun internasionál.

Prezidente AFA mós informa katak Timor-Leste sei konvidadu atu partisipa iha enkontru membru AFA iha fulan Jullu 2026 nu'udar observadór, hanesan pasu inisiál atu prepara an ba membru efetivu iha futuru.

Iha sorumutu ne'e, Diretor Ezekutivu AFA, Sr. Toto Alamsyah, halo apresentasaun kona-ba papél no responsabilidade AFA hanesan organizasaun kontabilidade rejionál ASEAN, inklui promosaun harmonizasaun padraun kontabilidade internasionál, dezenvolvimentu kapasidade institusionál, edukasaun profísionál, no asisténsia téknika ba nasaun membru sira.

Ministériu Finansas mós hato'o nesesidade apoiu tékniku prioritáriu sira, inklui formasaun ba formadór kontabilidade no auditoria, dezenvolvimentu kodigu étika profísionál, preparasaun kurríkulu sertifikasaun profísionál hanesan CA, CGA, CIA, CISA no CPA, no dezenvolvimentu sistema informatika ba rejistu membru no jestaun finansas PAO.

Remate enkontru, Vise-Ministra Finansas no Presidente AFA reafirma sira-nia komitmentu atu kontinua hametin parseria entre Ministériu Finansas, AFA no Indonesian Institute of Accountants (IAI) hodi apoia estabelesimentu Professional Accountancy Organization iha Timor-Leste. AFA mos enkoraja Governu atu aselera prosesu estabelesimentu PAO atu nune'e Timor-Leste bele hahú integra an iha rede profísionál kontabilidade rejionál no internasionál iha tempu badak.

Inisiativa ida-ne'e reflete kompromisiu Governu Timor-Leste atu hametin governasaun finanseira, aumenta kualidade relatoriu finanseiru no dezenvolve profisionál kontabilidade ho padraun internasionál, atu apoia dezenvolvimentu ekonomiku sustentável no integrasaun rejionál iha ASEAN.

#Foto #Ekipa #Media #Ministeriufinansas,

Tampilkan lebih sedikit