Macau (Xina), Loron 10 Fullan Juñu Tinan 2026,

Objetivu husi MoU ida ne’e, Ministru MPIE esplika katak, MoU ne’e atu fasilita Timor-oan sira bele estuda hanesan bolseiru iha USJ Macau.

Tanba Sidade Macau hanesan únika sidade iha Repúblika Xina ne’ebé moris husi lian Portuguesa no lian Xineza ho nia dinámika dezenvolvimentu ne’ebé singnifikativu tebes bá Timor-oan atu aprende.

Durante dekada barak bá kotuk, sidade Macau sai mós ponte importante ida atu liga Timor-Leste nia rezisténsia bá libertasaun nasionál ho mundu desde 1975 tanba lideransa Timor-oan inklui saudozu Proklamadór Francisco Xavier, hala’o nia estudu iha sidade Macau hanesan seminárista.

Ministru Gastão salienta taan, kooperasaun ida-ne’e la’ós de’it kona-bá asisténsia téknika. Ida ne’e kona-bá hakle’an relasaun ne’ebé iha ona durante tempu naruk no habelar relasaun ne’e bá jerasaun foun akadémiku Timor-oan sira.

Nune’e, memorandu entendimentu ida ne’e bele sai hanesan kapítulu foun ida iha amizade ne’ebé duradoura. Husu atu estudante sira tama liu husi odamatan ida-ne’e, husu atu povu Timor-Leste no Macau kontinua dezenvolve hamutuk iha koñesimentu, iha kapasidade nomos iha respeitu mútua.

MoU ne’e asina direta husi Júlio Aparício, Diretór Ezekutivu FDCH ho estrutura universidade UJS Macau no akompaña husi Ministru MPIE, Eng.Gastão Sousa, iha salaun audotoria UJS iha loron 10 fulan Juñu 2026.

Tuir planu, hafoin assina MoU, iha tinan 2027 sei implementa máxima akordu husi MoU refere hodi haruka Timor-Oan sira hala’o nia estudu iha UJS Macau liu husi bolseiru ne’ebé sei oferese husi FDCH ne’ebé tutela bá Ministériu MPIE. Bolseiru ne’ebé sei oferese barak liu sei kobre área siénsia téknolijia, agrikultura no saúde inklui enjiñaria konforme akordu ne’ebé estabelese.

Entretantu, UJS hanesan universidade privada harii husi igreja katólika liu husi diocese Macau iha reziaun administratva espesiál Macau iha tinan 1996 ho apoiu husi Universidade Katólika Portugál.

https://sdi.gov.tl/ministerio/presrealease/create

Média MPIE