Dili, 10 Juñu 2026

Ministru Transportes no Komuikasaun, Eng.Miguel Marques Gonçalves Manetelu konvida empreza Pertamina Internasionál Timor, SA (PITSA) no kompaña ETO hodi hetan atualizasaun no preparasaun bá realokasaun no instalasaun “Estasaun Kombustivel Temporária” (temporary fuel depot) iha Aeroportu Internasionál Presidente Nicolau Lobato (AIPNL).

Instalasaun fasilidade temporaria ne'e importante hodi mantein operasaun bá fornesimentu kombustivél bá aviaun hirak ne’ebé opera iha Aeroportu Internasionál Prezidente Nicolau Lobato (AIPNL), tanba fasilidades estasaun kombustivel ezistenti husi kompañia ETO no kompañia PITSA “fizikamente sei hetan impaktu” husi konstrusaun no expansaun AIPNL.

Rekorda fali katak hahu iha loron 11 fulan Fevereiru 2026, área ne'ebé atu instala fasilidade temporária entrega ona bá empreza PITSA no ETO,

no dadaun ne'e área refere hamos ona no iha tempu hanesan, halo hela koordenasaun ho Autoridade Nasionál Petroléu (ANP) hodi hetan lisensa operasaun antes hahu Instalasaun fasilidade Temporária. Maske ANATL ofisialmente entrega ona fatin/área estasionamentu kombustivel temporária iha 11 fevereiru 2026 maibe to'o ohin loron kompañia rua ne'e seida’uk hatudu progresu iha terrenu. Haree bá situasaun ne'e mak Ministru Transportes no Komunikasaun bolu urjente kompañia ETO ho PITSA hodi hatene tanba saida mak liu tia fulan seida’uk hahú konstrusaun fatin estasionamentu kombustivel temporária.

Iha reuniaun ne’e Ministru Manetelu hato’o katak, Governu da-sia lideradu Primeiru-Ministru, Kay Rala Xanana Gusmão iha komitmentu, hodi konklui projetu konstrussun no espansaun AIPNL tuir tempu ne’ebé determina ona ho nune’e, ejiji empreza PITSA no ETO nia komitmentu no esforsu hodi konklui prosesu re-alokasaun no instalasaun fasilidades bá fatin temporária tuir tempu ne’ebé determina ona husi parte Governu.

Entretantu iha tempu hanesan, ekipa Jestaun Projetu atualiza metódu servisu husi kontrator sira bá konstrusaun Pista, torre kontrólu no Terminál Pasajeirus foun hodi nune'e empreza PITSA no ETO bele apar no koopera wainhira prepara dadaun bá relokasaun no instalasaun fasilidade temporária.

 https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊