𝗗Í𝗟𝗜, 𝗠𝗝 — 𝗧𝗲𝗿𝘀𝗮-𝗳𝗲𝗶𝗿𝗮, 𝟬𝟵 𝗝𝘂𝗻̃𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, destaka prespetiva liuhosi oradór ba konvidadu sira iha ambitu semináriu nasional ho temátika “𝗣𝗼𝗹𝗶𝘁í𝗸𝗮 𝗻𝗼 𝗘𝗻𝗸𝘂𝗮𝗱𝗿𝗮𝗺𝗲𝗻𝘁𝘂 𝗝𝘂𝗿í𝗱𝗶𝗸𝗮 𝗯𝗮 𝗔𝗿𝗸𝗶𝘃𝘂 𝗻𝗼 𝗘𝘀𝗯𝗼𝘀𝘂 𝗟𝗲𝗶 𝗦𝗶𝗯𝗲𝗿𝗻é𝘁𝗶𝗸𝗮”, ne’ebé realiza hafoin serimónia inagurasaun Sentru Arkivu Centro Nacional Chega! (CNC), iha edifísiu Antiga Komarka, Balide, Munisípiu Díli.

Timor-Leste presiza duni atu iha enkuadramentu jurídiku ida ne’ebé forte no komprensivu kona-bá arkivu no sibernétika. Enkuadramentu jurídiku ne’e importante tebes atu garante jestaun, protesaun, konservasaun no utilizasaun arkivu sira ho di’ak, hanesan patrimóniu dokumentál Estadu nian ne’ebé iha valor istóriku, administrativu no jurídiku.

Ministru Justisa haktuir, lei kona-bá sibernétika sai mós instrumentu estratéjiku ida atu responde ba dezafiu teknolojia dijitál ne’ebé dadaun dezenvolve lalais, inklui seguransa informasaun, protesaun dadus, prevensaun krime sibernétiku no promosaun ambiente dijitál ida ne’ebé seguru no konfiável.

Tanba ne’e, Governu no Parlamentu Nasionál kompromete atu kontinua fó apoiu ba elaborasaun no aprovasaun ba instrumentu jurídiku sira ne’ebé nesesáriu, hodi hametin governasaun di’ak, transparénsia institusionál, preservasaun memória koletiva nasionál no seguransa sibernétika iha Timor-Leste.

Governu liuhosi Ministru Justisa, Dr. Sérgio de Jesus Fernandes da Costa Hornai hamutuk ho Ministru Administrasaun Estatal, (MAE), Tomas do Rosario Cabral no reprezentante povu iha fukun Parlamentu Nasionál, Vise-Prezidente Komisaun A ne’ebé maka trata kona-bá asuntu Kontitusionál no Justisa, deputadu Antonio Verdial.

Sentru Arkivu ne’e tenke sai sentru hodi institusionaliza memória, fatin aprendizajen nian, no mós fatin atu dignifika Timoroan rihun ba rihun ne'ebé mate, lakon, no terus tanba luta ba Ukun Rasik-An. Kontinua valoriza, no kaer metin ita-nia istória nasionál ba nafatin.

Iha semináriu ne’e, organiza husi Centro Nacional Chega!, partisipa mós husi konvidadu importante sira hosi instituisaun estadu, akademia, parseiru dezenvolvimentu, organizasaun sosiedade sivíl, juventude, peskizadór sira no reprezentante komunidade sira.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝘀𝗶𝗮 #

Tampilkan lebih sedikit