𝐃𝐢𝐥𝐢, 𝟎𝟖 𝐉𝐮ñ𝐮 𝟐𝟎𝟐𝟔–Vise-Ministru Komérsiu no Indústria Augusto Júnior Trindade, simu Embaixador Repúblika Koreia iha Timor-Leste no delegasaun bo’ot husi Koreia, inklui porta-voz hosi Ministry of Property Intelectual (MOIP) no Diretór husi Korea Invention Promotion Association (KIPA), iha edifísiu Gabinete Ministru MCI, Fomentu Mandarin.

Iha sorumtu ne’e, parte rua deskuti konaba Apoiu Tekniku ne’ebe mak Governu Repúblika Koreia sei fo mai Timor-Leste liuhosi MOIP no KIPA. Spesifikamente, diskusaun ne’e foka ba estabelesimentu sistema Propriedade Intelektuál (Intellectual Property – IP) no preparasaun Timor-Leste nian atu estabelese Eskritóriu Propriedade Inteletuál (IP Office). Iha okaziaun refere mos, delegasaun Koreia nian fahe esperiénsia no prátika di’ak sira kona-ba jestaun propriedade intelektuál, liuliu iha área aselerasaun prosesu estabelesimentu sistema sira.

Vise-Ministru Trindade fo agradese delegasaun nia objetivu no fo énfaze katak, propriedade intelektuál krítiku tebes ba dezenvolvimentu ekonomia no inovasaun nasional. Governu Timor-Leste iha kompromisu forte atu harii Eskritóriu Propriedade Inteletuál ida ne’ebé efikaz, wainhira Kódigu Propriedade Industrial vigora ona iha Timor-Leste. Nia mós hatutan tan katak, Timor-Leste simu ona apoiu kontinuadu hosi World Intellectual Property Organization (WIPO), ne’ebé kontribui iha preparasaun kuadru legal no fortalese kapasidade institusionál iha área propriedade intelektuál.

Propriedade Intelektuál ne’e mos konsidera importante tebes ba prosesu integrasaun Timor-Leste iha Association of Southeast Asian Nations (ASEAN) no Organizasaun Mundial Komersiu (OMC/WTO), tanba sei garante transparénsia merkadoria, proteje direitu inovadór no produtór sira, no asegura autentisidade produtu sira ne’ebé tama ba merkadu.

Reuniaun ne’e reafirma komitmentu Governu Timor-Leste no parseiru sira atu servisu hamutuk hodi estabelese sistema propriedade intelektuál ne’ebé forte, modernu no aliña ho padraun no pratika di’ak internasionál.

Duranti vizita ne’e, delegasaun hosi Repúblika Koreia ne’e mos sei halo workshop, seminariu, konsulta no formasaun pertinente sira duranti loron ha’at ho ekipa relevante Ministeriu Komérsiu no Indústria no mos parte interesadu sira, inklui setor privadu sira, atu bele hetan idea ida inkluzivu hodi bele oinsa apoia di’ak liután Timor-Leste.

Vise-Ministru Trindade, hodi Ministeriu Komérsiu no Indústria nia naran no Governu Timor-Leste hato’o agradesimentu ba delegasaun hosi Governu Repúblika Koreia, espesifikamente MOIP no KIPA ba inisiativa ida ne’e. Vise-Ministru mos hato’o nia apresiasaun klean ba apoiu finanseiru no tekniku ne’ebe fo hosi WIPO, Uniaun Europeia (UE) no mos International Trade Centre (ITC).

𝙈é𝙙𝙞𝙖 𝙈𝘾𝙄

See less