𝘿í𝙡𝙞, 08 𝙅𝙪𝙣𝙪 2026 - Ministériu Komérsiu no Indústria (MKI), liuhosi Diresaun Jeral Indústria, hala’o enkontru ho Grupo Voluntáriu Networking ne’ebé fó apresentasaun rezultadu dezenvolvimentu sistema base dadus indústria, Iha Sala Reuniaun Diresaun Jeral Industria, Fomentu Mandarin Dili.

Enkontru ne’e orienta husi Diretor Jeral Indústria, Sr. Jorge Ferreira.

Objetivu husi enkontru ne’e atu aprezenta no avalia sistema base dadus indústria ne’ebé dezenvolve husi grupu voluntáriu networking.

Sistema ne’e fó kontribuisaun importante ba Diresaun Jeral Indústria iha fasilitasaun prosesu rejistu, jestaun no atualizasaun informasaun kona-ba indústria sira iha Timor-Leste.

Durante enkontru ne’e ekipa voluntáriu ne’ebé halo servisu durante fulan ida aprezenta rezultadu dezenvolvimentu sistema refere. Aprezentasaun ne’e fó oportunidade ba parte rua atu haree hamutuk progresu sistema, halo diskusaun no fó hanoin konstrutivu atu hadi’a tan sistema ida.

Sistema base dadus indústria ne’e iha objetivu atu ajuda Diresaun Jeral Indústria kria no jere plataforma ida ne’ebé kompletu no atualizadu kona-ba indústria sira iha Timor-Leste. Ho implementasaun sistema ne’e, espera katak bele fasilita rejistu, monitorizasaun no rekolla dadus indústria sira ne’ebé eziste husi tinan 2021 to’o agora.

Aleinde ne’e, sistema refere sei sai instrumentu importante ba MKI atu hetan informasaun di’ak kona-ba dezenvolvimentu setor indústria no suporta prosesu planeamentu no tomada desizaun ba futuru.