Asuntu : Sekretariu Estadu partisipa iha selebrasaun Atinjimentu Traballadór Timor oan rihun 20 ne'ebé ba servisu ona iha Austrália. loron 17, fulan-Setembru, tinan 2025, Sekretariu Estadu ba Formasaun Profisionál no Empregu, Sua Exelensia Rogério Araújo Mendonça L.Ed, partisipa iha serimónia selebrasaun ba atinjimentu traballadór Timor oan rihun 20, ne'ebé mak ba servisu ona iha nasaun Austrália, atividade ne'e organiza husi PALM scheme. Iha diskursu Sekretariu Estadu ba Formasain Profisionál no Empregu,foka liu ba pontus importante sira hanesan tuir mai ne'e. Ha'u-nia laran kontente tebes atu hatene katak ita hotu iha ne'e atu komemora ezitu ida ne'ebé notável iha parcería entre Timor-Leste no Austrália. Ohin, liu husi Palm Scheme, ita komemora amizade no ezitu iha esforsu atu harii nasaun Timor-Leste ne'ebé estavel no forte, nasaun ne'ebé mak kolega no vizinhu ne'ebé besik liu ba Austrália. Iha tinan barak ona, Programa Mobilidade Laboral Timor-Leste Austrália, liu husi Palm Scheme, prova katak ita bele hetan buat barak se ita servisu hamutuk. Ohin, ita komemora laós númeru 20,000 traballadór deit, maibé ita komemora istória sira iha laran númeru ne'e, istória sira kona-ba coragem, esforsu, determinasaun, kompromisu no impaktu ne'ebé profundo ba familia no komunidade sira iha Timor-Leste. Ezitu programa ne'e ezitu ida ne'ebé partilhadu. Hau hakarak hatene agradecimentu ba kontribuisaun husi ex-Sekretáriu Estadu sira no funsionáriu dedikadu sira iha Labour Sending Unit (LSU), Sentru Treinamentu sira iha Timor-Leste no Austrália, Empregadór Aprovadu sira, agénsia kontrata traballadór sira no Asosiasaun Empregadór Aprovadu. Ezitu ne'e la bele akontese tanba la iha konfiansa no kompromisu husi Traballadór Sira ne'ebé fila fali no sira ne'ebé iha Australia agora. Ha'u mos hakarak agradecimentu ba parceiru sira iha DFAT Labour Mobility Branch iha Canberra no Embaixada Austrália iha Timor-Leste, inklui equipa PLMSP, tanba kolaborasaun ne'ebé valiozu, dedikasaun forte no coragem sira fó ba programa ne'e. Tinan 2025, Timor-Leste hetan posisaun kuartu iha lista nasaun sira ne'ebé hatama traballadór liu-liu ba Palm Scheme, ne'e prova klaru ba kompromisu nasaun no ezitu programa. Iha tinan 2024, Timor-Leste hatama 4,643 traballadór ba Austrália, 3,193 Mane no 1,449 Feto, ne'ebé mak númeru aas liu iha istória programa ida ne'e. Liuhosi númeru, programa ne'e fó benefísiu konkretu ba nasaun. Remesa osan ne'ebé traballadór sira fó ba familia sira iha uma, fó kontribuisaun importante ba dezenvolvimentu ekonomia, sustenta familia no negósio lokal sira. Traballadór sira laós deit hetan osan, maibé sira hetan habilidade foun iha área sira hanesan hospitalidade, literasia digital, prosesamentu karne, kuidadu idade no agrikultura no horticultura, ne'ebé sira bele uza atu fó kontribuisaun ba komunidade sira iha suku no aldeia sira. Traballadór Timor oan sira iha Australia hetan reputasaun di'ak tebes tanba sira servisu to'o liman, hakarak aprende, simpátiku no respeitu. Ne'e buat ida ne'ebé fó orgulho ba nasaun. Programa ne'e laós deit mobilidade laboral; ne'e programa ida atu harii relasaun ne'ebé lalais no profundo entre povu sira no nasaun sira. Ohin, ita haree ba futuru, ita komite atu kontinua ezitu ne'e. Programa ida ne'e mak fundasaun parcería ida ne'ebé fó oportunidade no harii prosperidade partilhadu ne'ebé bele benefisia ita hotu iha tinan sira mai. Importante tebes atu kontinua kontribui ba harii nasaun Timor-Leste ne'ebé forte no prósperu. Obrigadu barak. Iha serimónia partisipa mos husi Senhór Edward Wilkinson, Deputi Embaixador Austrália iha Timor-Leste, representante husi Embaixada Nova Zelândia, Japão no Coreia, representanti husi Labour Mobility Branch iha Canberra, líder equipa PLMSP no hotu-hotu konvidadu distinadu sira.
Data Publica : 18 Sep 2025
Descrisaun :
