𝗗í𝗹𝗶, 𝟭𝟬 𝗝𝘂ñ𝘂 𝟮𝟬𝟮𝟲- Ministériu Komérsiu no Indústria (MCI) liuhosi Diresaun Jerál Indústria hala’o enkontru ho Delegasaun Sentru Singapura hodi deskuti kona-ba Protesaun Marka Honda no Implementasaun Kodigu Propriedade Intelektual iha Timor-Leste, tersa(09/06)

Diskusaun ne’e fó enfase ba; Proteje no garante utilizasaun legal ba marka Honda iha Timor-Leste, sosializa Código da Propriedade Intelectual ba parte relevante sira, hametin koordena no kooperasaun entre MCI, Centro Singapura no kompañia sira ne’ebé uza marka Honda no assegura kualidade produtu no servisu atu aumenta konfiansa konsumidor sira.

Delegasaun Sentro Singapura, sira subliña katak marka Honda iha reputasaun bo’ot no valor ne’ebé presiza hetan proteção legal. Sira hateten utilizasaun marka tenke halao tuir lei no regulamentu vigente, atu mantén padraun kualidade no kredibilidade ba konsumidor.

Husi parte MCI mos fó esplisaun katak kódigo da Propriedade Intelectual aprova ona husi Parlamentu Nacional no promulga ona husi Presidente da República, no Ministériu sei responsabiliza ba implementasaun no rejistu marka tuir disposisaun legal.

Delegasaun Centro Singapura mos manifesta vontade atu kontinua servisu hamutuk ho Ministério no halo diálogo direta ho distribuidor, dealer no kompanhia sira nebe utiliza Marka Honda iha Timor-Leste. Sira kompreende katak Timor-Leste sei iha fase dezenvolvimentu sistema propriedade intelectual no prontu atu kontinua koordena no sosializa informasaun ba parte relevante sira.

Enkontru ne’e remata ho komprimisu husi parte hotu atu reforsa kooperasaun, promove protesaun propriedade intelectual, no garante katak utilizasaun marka Honda iha Timor-Leste lao tuir lei, mantén padraun kualidade, no fó benefísiu ba konsumidor sira.

𝙈é𝙙𝙞𝙖 𝙈𝘾𝙄

See less