𝐇𝐚𝐧𝐨𝐢, 𝐕𝐢𝐞𝐭𝐧𝐚𝐦𝐞, 𝟎𝟗 𝐉𝐮ñ𝐮 𝟐𝟎𝟐𝟔

========================

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, akompaña Primeiru-Ministru, Kay Rala Xanana Gusmão, iha enkontru bilaterál ho Prezidente Asembleia Nasionál Vietname, Tran Thanh Man, hodi aprende esperiénsia sira hosi Vietname nian iha área kooperasaun rejionál, dezenvolvimentu lejislativu no seluk tan.

Iha enkontru ho Prezidente Asembleia Nasionál Vietname, Tran Thanh Man, iha sede Asembleia Nasionál Vietname, iha Hanoi, Tersa, 09 Juñu 2026, Primeiru-Ministru, Kay Rala Xanana Gusmão hatete katak Governu Timor-Leste hakarak aprende esperiénsia hosi Vietname nian iha área oi-oin ne’ebé nesesáriu ba Timor-Leste liuliu iha aspetu dezenvolvimentu lejislativu no planeamentu nian.

PM Xanana espera katak Parlamentu Nasionál Timor-Leste bele realiza vizita ba Asembleia Nasionál Vietname iha futuru atu bele troka esperiénsia no reforsa relasaun entre instituisaun lejíslativa sira. Timor-Leste mós hakarak atu haklean kooperasaun iha área prioridade sira hanesan dezenvolvimentu ekonómiku, agrikultura, seguransa ai-han, konetividade no seluk tan.

“Ami fiar katak envolvimentu parlamentár ne’ebé forte liu bele ajuda hamosu fundasaun sólidu ba kooperasaun ne’ebé luan liu entre ita-nia povu sira,”hateten PM Xanana.

Partisipa iha reuniaun ne’e PM Xanana hetan akompañamentu hosi Vise-Primeiru-Ministru na’in rua membru Governu sira no delegasaun ofisiál Timor-Leste nian.

See less