𝐇𝐚𝐧𝐨𝐢, 𝐕𝐢𝐞𝐭𝐧𝐚𝐦𝐞, 𝟎𝟗 𝐉𝐮ñ𝐮 𝟐𝟎𝟐𝟔

========================

Vise-Primeiru-Ministru, MInistru Koordenadór Asuntu Ekonómiku no MInistru Turizmu no Ambiente, Dato’ Seri Francisco Kalbuadi Lay, akompaña Primeiru-Ministru, Kay Rala Xanana Gusmão, iha enkontru bilaterál ho Primeiru-Ministru Vietname, Le Minh Hung, iha Hanoi, Vietname, Tersa, Juñu 2026.

Iha enkontru ne’e, Primeiru-Ministru, Kay Rala Xanana Gusmão, destaka pontu importante sira hodi hatete katak Vietname nu’udár parseiru importante ba dezenvolvimentu Timor-Leste no reafirma kompromisu Governu nian atu hametin kooperasaun bilaterál iha área importante oioin.

“Ami sente onradu tebes mai iha Vietname, nasaun belun ida ne'ebé ami respeita no valoriza tebtebes. Timor-Leste no Vietname partilla esperiénsia istórika importante sira, inklui luta ba dignidade nasionál, rekonstrusaun nasaun no esforsu atu harii instituisaun forte hodi promove moris-di’ak ba povu,” hateten PM Xanana.

Hafoin enkontru ne’e, Timor-Leste no Vietname asina akordu importante hamutuk haat hodi hametin no habelar tan kooperasaun bilaterál entre nasaun rua iha área oioin ba futuru.

Rua hosi akordu hirak ne’e foka ba setór edukasaun no ensinu superiór, ho objetivu atu promove parseria entre instituisaun akadémika no sentru peskiza sira, fasilita interkámbiu estudante no dosente sira, dezenvolve programa formasaun no peskiza hamutuk, no habelar oportunidade bolsa estudu ba estudante sira hosi nasaun rua.

Akordu seluk sira inklui izensaun vistu ba portadór pasaporte komún no estabelesimentu kooperasaun entre Agência Noticiosa de Timor-Leste (TATOLI, I.P.) no Viet Nam News Agency (VNA), hodi reforsa troka informasaun no kolaborasaun iha área komunikasaun sosiál.

Iha enkontru ne’e, Primeiru-Ministru, Kay Rala Xanana Gusmão hetan akompañamentu hosi Vise-Primeiru-Ministru na’in rua, membru Governu relevante no delegasaun ofisiál Timor-Leste nian, inklui Embaixadór Timor-Leste ba Vietname, no reprezentante hosi instituisaun Estadu relevante sira.

See less