Dili, 11 Juñu 2026

Ministériu Transportes no Komunikasaun (MTK), hamutuk ho Administrasaun Aeroportos no Navegasaun Área Timor-Leste Empreza Públika (ANATL, E. P.) , Konsultor ho jornalista sira husi mídia nasionál realiza “Mídia Tour” bá Aeroportu Internasionál Prezidente Nicolau Lobato (AIPNL) atu haree direta progresu servisu dezenvolvimentu no expansaun aeroportu nian.

Antes hala’o vizita bá terenu, ekipa mídia hetan uluk briefing husi Xefe Gabinete no Koordenador ekipa Jestaun Projetu (PMU) MTK, José da Costa, kona-bá situasaun jerál projetu, prosesu konstrusaun no faze implementasaun ne’ebé daudaun ne’e la’o hela. Jornalista sira mós hetan orientasaun kona-bá aspetu seguransa no prosedimentu sira bainhira tama iha área konstrusaun husi kontrator PT. Waskita Karya.

Iha vizita ne’e, ekipa mídia haree direta área sira ne’ebé bá futuru sei halo konstrusaun inklui estrada asesu bá aeroportu, Terminál Pasajeirus foun, Torre Kontrolu, apron/parajen aviaun, no fasilidade sira seluk. Vizita kontinua bá área konstrusaun temporáriu PT. Waskita Karya, no depois bá área servisu Parallel Taxiway no expansaun pista iha zona Beto-Tasi, Suku Madohi.

Atualmente, kontrator bá komponente “Airside” kontinua hala’o servisu iha terenu tuir planu no zona prioridade sira. Servisu sira ne’e inklui konstrusaun “parallel taxiway”, preparasaun área, demolisasaun estrutura sira ne’ebé hetan ona kompensasaun, ateru rai no preparasaun bá espansaun pista no taxiway.

Durante vizita, Ministru Transportes no Komunikasaun, Manetelu, hateten katak projetu dezenvolvimentu no espansaun AIPNL lao hela tuir prosesu no konstrusaun sei la afeta operasaun normál aeroportu nian. Nia esplika katak expansaun aeroportu la’os de’it kona-bá konstrusaun pista maibé envolve mós fasilidade no operasaun sira seluk.

“Bainhira ita haree aeroportu, dala barak ema haree de’it pista, maibé parte importante ida mak aeroportu iha fasilidade barak ne’ebé presiza prepara no reloka. Tanba ne’e, prosesu ne’e lao hela no presiza koordenasaun ho parte hotu atu garante konstrusaun bele kontinua ho di’ak,” dehan Ministru Manetelu.

Ministru Manetelu hatutan liu tan katak “Públiku balu preokupa katak aeroportu ne’e la hahú mas aeroportu ne’e hahú ho difikuldade ohin esplika katak aeroprotu ne’e ita konstrui mais tempu hanesan operasaun aeroportu ne’e mós kontinua lao. Ita mós iha aviaun ne’ebé kalan para iha ne’e, aviaun kiik MAF nia ho sira seluk, ETO nia fatin iha ne’ebá ita tenke muda sai. Tanba ne’e mak ita lahateten katak ida ne’e difikuldade ka obstaklu ida, maibé ida ne’e mak bele kontribui mós”

Ministru Manetelu mós informa katak prosesu kona-bá asesu bá área sira seluk no preparasaun konstrusaun kontinua hala’o, inklui preparasaun bá produsaun tetrapod iha área tasi ibun no preparasaun husi TOA Corporation, kontrator Terminál Pasajeirus, atu instala sira nia fasilidade temporária no prepara área konstrusaun.

Entretantu, reprezenta husi PT. Waskita Karya, Muhamad Yunus Asya’ry, hateten katak kontrator kontinua komprometidu atu entrega projetu tuir prazu ne’ebé determina. Maske iha balun obstákulu tékniku durante implementasaun, kontrator sei aumenta rekursu no halo servisu paralelu hodi aselera progresu konstrusaun.

“Ami sei kontinua halo avaliasaun no koordenasaun besik ho Ministériu Transportes no Komunikasaun husi parte interesada sira seluk, ami bele garante katak projetu bele entrega tuir planu marsu 2028”dehan reprezentante Waskita Karya.

Media Tour ne’e sai hanesan oportunidade importante ida atu fó informasaun direta no transparente bá públiku kona-bá progresu reál projetu infraestrutura estratéjiku ida ne’ebé boot liu iha Timor-Leste.

Dezenvolvimentu no expansaun AIPNL la’ós de’it kona-bá harii edifísiu foun maibé hanesan investimentu importante bá futuru dezenvolvimentu ekonomia nasionál, haforsa konektividade rejionál no aumenta kapasidade Timor-Leste iha setór aviasaun.

Apoiu husi parseiru dezenvolvimentu sira, kompromisu husi kontrator no konsultor sira, Governu Timor-Leste kontinua komprometidu atu entrega aeroportu internasionál modernu, seguru no efisiente ne’ebé sei prepara Timor-Leste atu sai uma-nain bá eventu internasionál sira, inklui ASEAN iha tinan 2029.

https://sdi.gov.tl/ministerio/presrealease/create

𝐌é𝐝𝐢𝐚 𝐌𝐓𝐊