Dili, 12 Juñu 2026

Ministru Transportes no Komunikasaun Eng.Miguel Marques Gonçalves Manetelu sesta ne’e, partisipa iha Serimónia Inaugurasaun no bensaun bá edifísiu temporáriu bá ANATL-EP iha Aeroportu Internasionál Prezidente Nicolau Lobato Komoro Dili.

Edifísiu temporáriu ne’e hetan bensaun husi Pe. Acásio Castro SDB, liuhusi bensaun ne'e hodi husu protesaun no bensaun bá fatin servisu foun ne'e, atu nune'e servisu hotu ne'ebé hala'o iha laran bele la'o ho susesu no responsabilidade aas bá interese nasionál.

Prezensa edifísiu temporáriu ne'e parte husi vizaun Governu Timor-Leste nian, liuhusi Ministériu Transporte no Komunikasaun (MTK), hodi dignifika servisu ANATL-EP iha aeroprtu ho kondisaun servisu ne'ebé adekvadu, di'ak no profisionál liután. ANATL, E.P. fiar metin katak funsionáriu sira sei iha motivasaun ne'ebé aas hodi kontinua fó servisu ne'ebé ho kualidade.

Prezidente ANATL-EP, Romualdo António Soares da Silva, agradese bá governu liuhusi lideransa Ministru Manetelu nia bele harii edifísiu temporáriu ne’e hodi fasilita servisu operasaun sira iha aeroportu.

“Fatin ida para ami bele hamahan aan hodi halo atividade servisu operasionál ho ida ne’e ha’u nia obrigado wain bá señor Ministru MTC ho lideransa señor Ministru nia prepara netik fatin oan ida ne’’e, ohin dehan New Office But This Not New Office But This Temporary Office. Ida ne’e mak edifísiu temporáriu atu halo ami nia kna'ar ho Stakeholder sira hotu, iha ne’e ami prepara bá Stakeholder hotu-hotu ne’ebé halo atividade iha aeroportu ida ne’e, hodi nune’e ami bele servisu hamutuk, dehan Prezidente ANATL-EP, Romualdo António Soares da Silva.

Entertantu Ministru Manetelu iha nia diskursu husu bá ANATL atu uja ho kuidadu edifísu temporáriu ne'e ho nune’e bele halo koordenasaun di’ak durante espansaun no dezenvolvimentu Aeroportu Internasionál Prezidente Nicolau Lobato Dili.

“Aproveita ho momentu bensaun edifísiu temporáriu ANATL, E.P, mai atu tur hamutuk hodi halo diskusaun bá buat balu ne'ebé mak durante ne'e lao hela no bá funsionáriu tomak ne'ebé hamahan aan iha ANATL, E.P., Stakholder sira, atu uza edifísiu ne'e ho didi’ak tranzitoriamente, hodi asegura operasaun Aeroportu nian, durante projetu kontrusaun Aeroportu la’o. Ida ne’e hanesan edifísiu temporáriu bá ANATL ohin hetan ona bensaun, uza eskritóriu ne’e ho responsabilidade di’ak no kuidadu bá, nune’e ema hotu-hotu ne’ebé hamahan aan iha uma ida ne’e atu asegura operasaun Aeroportu nia tanba ita hetan fatin oitua-oituan iha ne’e para atu asegura koordenasaun servisu sira ne’e ” Ministru Manetelu husu.

Edifísiu temporáriu ne'e importante tebes tanba nia sai nu'udar ponte ida hodi garante katak servisu ANATL, E.P. la para no kontinua la'o, liuhusi koordenasaun ne’ebé di’ak entre ANATL ho parseiru sira hodi hala’o atividades operasionál tomak nomos fó assisténsia bá projetu ne'ebé lao hela iha aeroportu.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊