𝗥𝗮𝗶𝗹𝗮𝗸𝘂, 𝟭𝟭 𝗝𝘂𝗻𝘂 𝟮𝟬𝟮𝟲

Ministru Obras Públikas, Samuel Marçal lori IX Governu Konstitusionál nia naran hamutuk ho embaixadora Austrália bá Timor-Leste, Caitlyn Wilson, ofisialmente inagura projetu demonstrasaun estrada rurál dahuluk ne’ebé uza teknolójia Fiber Reinforced Concrete (FRC) iha suku Lihu no Railaku Kraik, Postu Administrativu Railaku, Munisípiu Ermera.

Iha nia deskursu Ministru Obras Públikas, hateten projeitu estrada ne’ebé ohin lansa ne’e hanesan projetu pilotu ida atu demonstra bá estrada rurál sira ne’ebé uza teknolójia Fiber Reinforced Concrete (FRC).

“Projetu estrada rurál ida ne’e hanesan atividade pilotu ida hodi demonstra sistema uza teknolójia Fiber Reinforced Concrete (FRC) ne'ebé foin uza uluk iha Timor-Leste. Simentu ne'e kahur ho fibra macro polypropylene hodi hamenus nakfera, tahan bá rai-monu no rezistente liután bá tempu udan boot iha Ermera hodi bele fó kualidade ida forte durante implementasaun, "dehan MOP Samuel Marçal.

Ministru Obras Públikas, afirma, Governu mós sei uza sistema ne’e iha área 10 iha territóriu nasionál ho orsamentu ne’ebé Governu iha.

“Rezultadu husi projetu pilotu iha Ermera sei sai referénsia importante bá expansaun teknolójia FRC bá munisípiu seluk iha Timor-Leste, tanbá ne'e Governu liu husi Ministériu Obras Públikas prepara ona planu atu implementa teknolójia hanesan iha munisípiu sanulu iha nasaun tomak hodi fortalece konetividade rurál no apoia kresimentu ekonomia lokál”, hateten Ministru Obras Públikas

Embaixadora Austrália iha Timor-Leste, Caitlyn Wilson,hateten, Governu Austrália iha komprimisiu atu kontinua apoia dezenvolvimentu infraestrutura ne’ebé reziliénte no sustentável iha Timor-Leste.

“Governu Austrália sente orgullu parseria ho Governu Timor-Leste hodi entrega estrada ne’ebé reziliénte bá klima. Liuhusi introdusaun teknolójia FRC, ita harii infraestrutura ne’ebé dura, ne’ebé garante asesu seguru no konfiável liu bá komunidade lokál sira maske durante kondisaun tempu ne’ebé estremu,"ténik Embaixadora Austrália iha Timor-Leste Caitlyn Wilson

Iha biban ne’e nain bá Kompañia Lokál Doben Unipessoal Lda, Francisco de Jesus haktuir nia senti bele hola parte iha projetu estrada rurál ne’ebé uza teknolójia foun hanesan FRC.

“Projetu estrada ida ne'e lá hanesan ho projetu estrada bain-bain, tanbá uza beton, sira nia sistema teknolójia foun bá estrada nian ne'e di'ak, enjeñeiru sira dehan ida ne'e sei dura bá tempu naruk, ami hanesan emprezariu lokál prontu lao tuir kontratu ne'ebé mak asina ona”, ténik nain bá kompañia Domin Unipessoal Lda.

Projetu estrada ne’e envolve rehabilitasaun no manutensaun estrada ho distánsia kilometru neen, entre suku Lihu no Railaku Kraik, nune'e finansiadu liu husi parseria Governu Austrália ho apoiu husi programa PARTISIPA, ho Orsamentu montante $454.260,94,hodi introdús teknolójia estrada reziliénte bá klima iha Timor-Leste.

https://sdi.gov.tl/ministerio/presrealease/create

*𝗠í𝗱𝗶𝗮-𝗠𝗢𝗣*