𝗦𝗶𝗻𝗴𝗮𝗽𝘂𝗿𝗮, 𝟭𝟳 𝗝𝘂𝗻̃𝘂 𝟮𝟬𝟮𝟲

Ministru Obras Públikas, Samuel Marçal ho delegasaun hala’o enkontru bilaterál ho Saroj Kumar Jha (Diretór Globál bá Prátika Bee Banku Mundiál nian) ho nia ekipa, hafoin remata han hamutuk iha, Marina Bay Sands, kuarta-feira ne’e.

Enkontru ida ne’e sai nu'udar momentu espesiál ida bá Ministériu Obras Públikas hodi hametin kooperasaun estratéjika bá dezenvolvimentu nasionál Timor-Leste nian.

Ministru Obras Públikas (MOP), Samuel Marçal, hateten lori governu no povu Timor-Leste nia naran mai partisipa iha eventu boot ne’e, mai atu aprende kona-bá dezenvolvimentu infraestrutura modernu, jestaun rekursu bee no jestaun kontrolu inundasaun.

Diretór Globál bá Prátika Bee Banku Mundiál, Saroj Kumar Jha, Banku Mundiál (World Bank) hateten, Banku Mundiál prontu apoiu governu Timor-Leste no garante katak Banku Mundiál (World Bank) prontu ona atu fó apoiu tékniku no finansiamentu hodi hadi'a kualidade moris povu Timor-Leste nian.

Apoiu ne'ebé Banku Mundiál hato'o bá IX Governu Konstitusionál liuhusi Ministru Samuel Marçal foka liuliu bá kestaun tolu:

Sustentabilidade infraestrutura: garante katak investimentu hotu-hotu bá dezenvolvimentu bee moos labele serbí de'it bá tempu badak, maibé tenke iha duni durabilidade no sustentabilidade bá tempu naruk.

Modernizasaun saneamentu: alende bee moos, kometimentu ne'e kobre mós dezenvolvimentu bá sistema saneamentu ne'ebé di'ak, hodi redús moras no hadi'a ijiene iha komunidade nia leet.

Fortalesimentu Institusionál, fó formasaun téknika no kapasitasaun instituisaun sira hanesan Bee Timor-Leste (BTL, E.P.) hodi jere rekursu bee ho efisiente no kria planu foun bá área rurál sira.

Delegasaun Timor-Leste ne’ebé akompaña Ministru Obras Públikas, hodi partisipa iha Singapore Internationál Water Week, Country Director Banku Mundiál iha Timor-Leste, David Freedman, Project Management Unit-Minstériu Obras Públikas (PMU-MOP),Nelson Mesquita, Prezidente Komisaun Ezekutiva (KE) Bee Timor-Leste, Empreza Públika (BTL, E.P.), Gustavo da Cruz ho assessor juridiku MOP, Paulo Palma.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*