𝐊𝐚𝐳𝐚𝐧, 𝟏𝟖 𝐉𝐮𝐧̃𝐮 𝟐𝟎𝟐𝟔

===============

Prezidente Federasaun Rúsia, Vladimir Putin, halibur líder sira hosi nasaun ASEAN nian ba Simeira Rúsia-ASEAN 2026 ne'ebé hala'o iha Kazan, Rúsia hodi destaka respeitu ba lei internasionál no kooperasaun estratéjiku sira.

Iha nia mensajen, Putin subliña kompromisu Moskovu nian hodi hametin lasu ekonómiku sira ho nasaun sira sudeste aziátiku nian. Nia optimista katak fórum ne'e sei loke oportunidade foun sira ba komérsiu, investimentu, no kooperasaun industriál entre Rúsia no ASEAN.

Prezidente Putin mós hato'o bemvindo ba Timor-Leste nu'udar membru ASEAN bá da-11 no partisipa iha Simeira Rúsia-ASEAN 2026.

"Prinsípiu importante ida iha relasaun internasionál mak respeitu mútua ba lei internasionál, soberania no integridade teritoriál nasaun sira, atu garante paz no estabilidade rejionál no globál. Turbulénsia jeopolítika ne'ebé akontese iha parte oioin mundu nian daudaun aumenta inserteza globál, no tanba ne'e nasaun sira presiza hametin kooperasaun. Ha'u fiar katak enkontru ida-ne'e sei kria oportunidade foun sira hodi habelar komérsiu, investimentu no kooperasaun industriál, seguransa, enerjétika, agrikultura, dijitalizasaun, turizmu, siénsia no teknolojia ne'ebé fó benefísiu ba malu no hametin diálogu diretu entre komunidade sira," Putin hatete iha enkontru ho líder sira ASEAN nian iha Kinta, 18 Juñu 2026.

Enkontru ne'e mós hodi hametin parseria estratéjika entre Rúsia ho nasaun sira ASEAN nian hanesan Brunei Darussalam, Kamboja, Indonézia, Laos, Malázia, Myanmar, Filipina, Singapura, Tailándia, Timor-Leste no Vietname.

Simeira ne’e mós marka tinan 35 relasaun Rúsia nian ho ASEAN. Simeira Rúsia-ASEAN 2026 hala'o durante loron tolu hosi 17-19 juñu 2026 no Timor-Leste foin ba dahuluk partisipa iha simeira ne'e.

Delegasaun Timor-Leste ne'ebé partisipa iha enkontru ne'e mak Primeiru-Ministru, Kay Rala Xanana Gusmão, Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, Ministru Negósiu Estranjeiru no Kooperasaun, Bendito Freitas, Vise-Ministra ba Asuntu ASEAN, Milena Rangel no seluk tan. 𝐅𝐨𝐧𝐭𝐞𝐬: 𝐑𝐮𝐬𝐬𝐢𝐚-𝐀𝐒𝐄𝐀𝐍 𝐒𝐮𝐦𝐦𝐢𝐭

See less

https://www.youtube.com/watch?v=BR4pNuZw6HI