𝗗í𝗹𝗶, 𝟯𝟬 𝗝𝘂ñ𝘂 𝟮𝟬𝟮𝟲 – Ministériu Komérsiu no Indústria (MCI), liuhosi Diresaun-Jerál Indústria, hamutuk ho parseiru dezenvolvimentu International Labour Organization (ILO) no reprezentante husi ajénsia interministerial, hala’o Diskusaun Meza Redonda kona-ba Hametin Kolaborasaun Kadeia Valór Agrofloresta.

Enkontru ida-ne’e partisipa husi reprezentante husi ILO, Uniaun Europa, SEFOPE, SECoop, AEMTL, IADE, MCAE, Ministériu Agrikultura, Ministériu Turismu no Ministériu Edukasaun.

Diretór-Jerál Indústria, Jorge Ferreira, Iha nia intervensaun, hateten katak hafoin halo avaliasaun ba projetu sira ne’ebé implementa husi ILO no ministériu relevante sira, identifika ona área barak ne’ebé iha relasaun direta ho servisu MCI.

Tanba ne’e, MCI koordena ho ILO hodi organiza enkontru meza redonda ne’e atu fortalese koordenasaun no promove kolaborasaun entre parseiru dezenvolvimentu no liña interministerial sira, hodi bele hametin kooperasaun no sinerjia entre instituisaun sira iha dezenvolvimentu setor agroflorestál. Nune’e, apoiu ne’ebé fó ba komunidade no benefisiáriu sira bele sai efetivu, integradu no fó rezultadu ne’ebé hanesan.

Durante diskusaun, ministériu no instituisaun sira identifika oportunidade ne’ebé maka sira bele servisu hamutuk, liuliu iha área formasaun, kapasitasaun no apoiu ba grupu benefisiáriu sira. Ministériu no instituisaun sira mós aprezenta ideia kontribuisaun no rekursu ne’ebé bele fó ba planu kolaborasaun ida-ne’e, ho objetivu atu hametin parseria interministerial, asegura implementasaun programa sira ho efisiente no apoia dezenvolvimentu negósiu, inklui hasa’e kapasidade no kompetitividade Empreza Mikro, Ki’ik no Médiu (MSMEs) iha merkadu.

Media MCI

See less