𝗗Í𝗟𝗜, 𝗠𝗝 — 𝗞𝗶𝗻𝘁𝗮-𝗳𝗲𝗶𝗿𝗮, 𝟬𝟮 𝗝𝘂𝗹𝗹𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, hala'o enkontru ho Enkaregadu Negósiu Vietname iha Timor-Leste, Sr. Pham Binh Dam, hodi ko'alia kona-ba reforsu kooperasaun bilateral iha setor justisa no área sira seluk ne'ebé sai interese hamutuk ba nasaun rua, iha Sala Sorumutuk Gabinete Ministru Justisa, edifísiu Ministériu Justisa, Kolmera, Díli.

Ministru Justisa hato'o boas-vindas ba Enkaregadu Negósiu Embaixada Vietnam iha Timor-Leste. Ministériu Justisa kontinua iha kompromisu atu hametin no promove relasaun serbisu diplomatika ne'ebé konstrutivu ho Embaixada Repúblika Sosialista Vietname, hodi kontribui ba fortalese amizade tradisionál, respeitu mútuu no kooperasaun bilateral entre nasaun rua, liuliu iha área sira ne'ebé sai kompeténsia Ministériu Justisa.

Oportunidade ida-ne’e, reprezentante diplomátiku Vietname atu introdús formalmente ba Ministru Justisa, nune'e mós atu troka hanoin kona-ba oinsa bele alarga no aprofunda tan koperasaun bilateral entre Governu Repúblika Demokrátika Timor-Leste no Governu Repúblika Sosialista Vietname, liuliu iha área sira ne'ebé responsabiliza Ministériu Justisa.

Parte rua ne’e, diskute mós oportunidade sira atu hametin tan amizade tradisionál no koperasaun mutuamente benefísiu entre Timor-Leste no Vietname, inklui área sira hanesan dezenvolvimentu lei no polítika jurídika, fortalese instituisaun judisiáriu, troka esperiénsia téknika no kapasitasaun rekursu umanu, hodi fó kontribuisaun ba dezenvolvimentu setor justisa iha nasaun rua.

Liu hosi enkontru ida-ne'e, parte rua reafirma sira-nia vontade atu kontinua dezenvolve diálogu no koperasaun ne'ebé metin, hodi haburas relasaun diplomátika no amizade entre Timor-Leste no Vietname, no promove inisiativa sira ne'ebé bele fó benefísiu ba povu nasaun rua.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

Tampilkan lebih sedikit