𝐃í𝐥𝐢-𝐊𝐮𝐚𝐫𝐭𝐚 𝟏 𝐉𝐮𝐥𝐥𝐮 𝟐𝟎𝟐𝟔,

Ministériu Finansas, liuhusi Institutu Nasionál Estatístika Timor-Leste, Institutu Publiku, (INETL, I.P.), realiza treinamentu kona-ba kolekta no análiza dadus ba funsionáriu sira husi Ministériu Komérsiu no Indústria (MCI-sigla portugés).

Objetivu husi treinamentu ne'e atu hasa'e kapasidade téknika funsionáriu sira iha área kolekta, jestaun no análiza dadus tuir padraun internasionál, atu garante dadus estatístika ne'ebé produz sai baze ida ne'ebé loloos ba toma desizaun no formulasaun polítika públika.

Prezidente INETL,I.P, Sr. Elias dos Santos Ferreira, destaka estatístika ofisiál mak sai komunikasaun importante ida ne'ebé fornese informasaun representativu no loloos ba governu, setór privadu no públiku atu bele toma desizaun ne'ebé bazeia ba evidénsia.

Nia salienta “treinamentu ne'e la'ós deit kona-ba téknika kolekta no análiza dadus, maibé mós fó koñesimentu kona-ba utilizasaun sistema mapa estatístiku (GIS), ne'ebé fasilita utilizadór sira atu hare'e no analiza dadus tuir área jeográfika to'o nível suku. Ho mapa ne'e, utilizadór bele identifika lalais informasaun estatístika iha kada área atu suporta planeamentu no monitorizasaun programa governu”.

“INETL,I.P, regularmente públika estatístika kona-ba setór komérsiu, inklui estatístika mensal no anuál kona-ba importasaun no exportasaun, destinasaun komérsiu, tipu sasan ne'ebé Timor-Leste importa no exporta, no análiza tendénsia atividade komersial iha Timor-Leste. Dadus hirak ne'e importante tebes atu ajuda governu no parseiru dezenvolvimentu sira formula polítika ne'ebé responde ba nesesidade reál ekonomia nasionál.” salienta Prezidente INETL, I.P.

Iha sesaun abertura, Diretór Jerál MCI, Sr. Elias de Jesus Fátima, hato'o agradese ba Ministériu Finansas liuhusi INETL, I.P, ba apoiu no kolaborasaun ne'ebé kontinua entre instituisaun rua ne'e, treinamentu ida ne'e implementa tuir akordu kolaborasaun governu nian ne'ebé estabelese ona iha tinan hirak liubá.

Tuir Diretór-Jerál ne’e, dadus ne'ebé loos kompletu no validu iha papél importante atu fó imajen loloos kona-ba realidade Timor-Leste, relatóriu no informasaun balun ne'ebé publika husi entidade sira iha li'ur la refleta kondisaun real iha rai laran tanba prosesu kolekta dadus la tuir metodologia estatístika no kontestu lokál.

“Hau husu ba partesipante sira hotu uza oportunidade ida ne’e, uza tempu ida ne’e hodi hasa’e no eleva ita bo’ot sira nia kapasidade, hodi kontribui ba rai no ita nia nasaun ida ne’e, liuliu Ministériu Komérsiu no Industria.” Hatete Diretór Jerál MCI.

Treinamentu ne’e realiza iha salaun MCI, formadór sira mai husi INETL,I.P, ne'ebé fahe esperiénsia kona-ba metodologia kolekta dadus, jestaun baze dadus, análiza estatístika no rezultadu atu asegura kualidade informasaun estatístika. Partisipante sira iha treinamentu ne’e hamutuk ema tolunulu (30) husi nivél nasionál no munisípal.

#Foto #Ekipa #Media #Ministeriufinansas

Tampilkan lebih sedikit