𝐉𝐞𝐧𝐞𝐛𝐫𝐚, 𝐒𝐮𝐢𝐬𝐚, 𝟗 𝐉𝐮𝐥𝐥𝐮 𝟐𝟎𝟐𝟔 - Iha marjem 68.ª Assembleia Estadu-Membru Organizasaun Mundiál ba Propriedade Intelektuál (OMPI), Delegasaun Timor-Leste lideradu husi Ministru Komérsiu no Indústria, Sua Exelénsia Sr. Nino Pereira, akompañadu husi Embaixadór no Reprezentante Permanente Timor-Leste iha Jenebra, Sua Exelénsia Sr. António da Conceiçã, hala’o enkontru bilateral ho Ministru Propriedade Intelektuál Repúblika Koreia, Dr. Kim Yong Sun iha Hotel Intercontinental, Genebra.

Enkontru ne’e fó oportunidade atu diskuti kooperasaun hodi avansa sistema propriedade intelektuál (PI) Timor-Leste.

Iha sorumutu, governante nain rua reafirma amizade forte entre Timor-Leste no Repúblika Koreia, no espresa sira-nia kompromisu hamutuk atu hametin kooperasaun bilaterál iha ámbitu propriedade intelektuál. Ministru Koreia hato’o apresiasaun ba Timor-Leste nia kompromisu atu halo propriedade intelektuál sai pilar estratéjiku ba dezenvolvimentu ekonómiku nasionál, no reafirma prontidaun Repúblika Koreia atu fó apoiu ba estabelesimentu no operasionalizasaun Eskritóriu Nasionál Propriedade Intelektuál dahuluk dahuluk iha Timor-Leste liuhosi kapasitasaun, kooperasaun téknika no fahe koñesimentu.

Ministru Nino Pereira, lori Governu Timor-Leste nia naran, hato’o nia apresiasaun ba apoiu hotu hosi Repúblika Koreia, no informa ba nia omólogu kona-ba progresu Kódigu Propriedade Industriál Timor-Leste, ne’ebé iha hela fase finál aprovasaun Parlamentu Nasionál.

Governante rua mós diskute preparasaun ba asina Memorandu Entendimentu (MoU) kona-ba kooperasaun propriedade intelektuál, no reafirma sira-nia kompromisu atu hametin parseria liután entre nasaun rua ne’e.

𝙈é𝙙𝙞𝙖 𝙈𝘾𝙄

See less