𝗗𝗜́𝗟𝗜, 𝗠𝗝—𝗞𝗶𝗻𝘁𝗮-𝗳𝗲𝗶𝗿𝗮 𝟬𝟵 𝗝𝘂𝗹𝗹𝘂 𝟮𝟬𝟮𝟲, Governu liuhosi Ministru Justisa, Dr. Sérgio de Jesus Fernandes da Costa Hornai, no Ministra Saúde, Dra. Élia António de Araújo dos Reis Amaral, ofisiálmente asina Memorandu de Entendimentu (MdE) hodi hametin kooperasaun institusionál entre Ministériu Justisa no Ministériu Saúde tuir padraun direitus umanus ba rekluzu sira iha estabelesimentu prizional sira iha Timor-Leste.

Serimónia asinatura MdE ne'e, realiza iha Ministériu Sáude, Cai-Coli, Díli. Hodi reforsa komitmentu governu atu promove sistema koreksaun ne'ebé la'ós de'it fó prioridade ba seguransa no administrasaun prizional, maibé mós asegura asesu ba kuidadu saúde ne'ebé adekuadu ba reklusu sira.

Objetivu MdE ne'e, atu hametin kooperasaun entre parte rua iha área saúde iha estabelesimentu prizional sira, liuhosi mekanizmu koordenasaun, planeamentu, implementasaun no monitorizasaun programa saúde sira ne'ebé integra no sustentável. Kooperasaun ida ne'e sei fó prioridade ba promosaun saúde, prevensaun moras, tratamentu médiku, servisu saúde mental, kontrolu moras transmisível no la transmisível, imunizasaun, nutrisaun, saúde inan no labarik, no resposta ba situasaun emerjénsia saúde iha estabelesimentu prizional sira.

Ministru justisa hateten liuhosi nia diskursu katak, kooperasaun institusionál entre Ministériu Justisa no Ministériu Saúde iha área prestasaun servisu saúde ba estabelesimentu prizionál sira, bazeia ba prinsípiu benefísiu mútuu, respeitu mútuu, responsabilidade hamutuk no koordenasaun efetiva, hodi asegura asesu ba servisu saúde ne’ebé di’ak, dignu no ho padraun apropriadu ba rekluzu sira.

Liuhosi Memorandu de Entendimentu ida ne’e, Ministériu rua kompromete atu fornese asisténsia saúde, inklui atendimentu médiku no primeiru socorros, ba rekluzu sira iha Estabelesimentu Prizionál Bekora, Suai no Gleno, hodi responde ba nesesidade saúde ne’ebé bele mosu durante sira nia detensaun.

Tanba ne’e, akordu interministeriál ida ne’e sei fasilita fornese medikamentu essensiál, servisu primeiru socorros, no asisténsia médika tuir nesesidade, inklui ba rekluzu vulnerável sira hanesan katuas no ferik, feto isin-rua, inan ho labarik sira ne’ebé hela iha estabelesimentu prizionál tuir lei.

MdE ida-ne’e mos, reflete kompromisu Governu atu promove direitu ba saúde, proteje dignidade ema hotu, no hametin sistema korresionál ida ne’ebé umanu, inkluzivu no tuir padraun direitus umanus internasionál.

Iha fatin hanesan Ministra Saúde mós reafirma komitmentu Ministériu Saúde atu kontinua fó apoiu tékniku no mobiliza rekursu sira ne'ebé presiza asesu ba servisu saúde ne'ebé kompletu, kontinuadu ba rekluzu sira hanesan katuas no ferik, inan isin-rua no labarik sira.

Ministra Saúde hato'o agradesimentu ba dirijente sira hosi Ministériu Justisa no Ministériu saude tanba bele realiza lalais asinatura Memorandu de Entendimentu (MdE) ida-ne’e. Tanba kooperasaun ida-ne'e sai hanesan pasu estratéjiku atu habelar no hametin prestasaun servisu saúde to'o iha fatin hotu-hotu ne'ebé dadur dadur sira hasoru iha estabelesimentu prizionál sira.

Serimónia ne'e mós hetan partisipasaun husi dirijente sira husi Ministériu Justisa no Ministériu Saúde, reprezentante institusionál relevante sira, no konvidadu ofisiál sira ne'ebé testemuña komitmentu parte rua atu kontinua reforsa kooperasaun estratéjika ba benefísiu sistema koreksaun no povu Timor-Leste tomak.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

Tampilkan lebih sedikit