𝐃Í𝐋𝐈-𝐊𝐢𝐧𝐭𝐚 𝟗 𝐉𝐮𝐥𝐥𝐮 𝟐𝟎𝟐𝟔.

Ministériu Finansas kontinua komprometidu atu hametin sistema governasaun finanseira rai-laran. Iha tinan 2026, Governu sei aselera implementasaun 𝐑𝐞𝐟𝐨𝐫𝐦𝐚 𝐉𝐞𝐬𝐭𝐚𝐮𝐧 𝐅𝐢𝐧𝐚𝐧𝐬𝐞𝐢𝐫𝐚 𝐏ú𝐛𝐥𝐢𝐤𝐚 (𝐉𝐅𝐏) liuhusi Akordu Doasaun ne'ebé foku liu ba hametin regulamentu, hasa'e kapasidade rekursu umanu, no estabelese baze solidu ba padraun internasionál sira.

Programa reforma ida-ne'e kontinua hakat importante sira ne'ebé hahú ona iha períodu 2023-2025, no sei foku ba área estratéjiku oinoin, inklui padraun kontabilidade, reforma tributária, jestaun patrimóniu, divida estadu, no parseria públiku-privadu.

𝐅𝐨𝐤𝐮 𝐏𝐫𝐢𝐧𝐬𝐢𝐩á𝐥 𝐑𝐞𝐟𝐨𝐫𝐦𝐚 𝐢𝐡𝐚 𝟐𝟎𝟐𝟔:

𝟏. 𝐇𝐚𝐦𝐞𝐭𝐢𝐧 𝐏𝐚𝐝𝐫𝐚𝐮𝐧 𝐊𝐨𝐧𝐭𝐚𝐛𝐢𝐥𝐢𝐝𝐚𝐝𝐞 𝐍𝐚𝐬𝐢𝐨𝐧á𝐥

Ministériu Finansas sei kontinua finaliza esbosu kona-ba polítika kontabilidade no baze legál nesesáriu hodi asegura konverjénsia padraun kontabilidade nasionál ho norma internasionál sira. Ida-ne'e inklui implementasaun IPSAS ba setór públiku no IFRS ba setór privadu. Atividade ida-ne'e mós inklui hametin kapasidade rekursu umanu antes implementasaun padraun foun sira-ne'e.

𝟐. 𝐄𝐬𝐭𝐮𝐝𝐮 𝐈𝐧𝐢𝐬𝐢𝐮 𝐧𝐨 𝐅𝐨𝐫𝐦𝐮𝐥𝐚𝐬𝐚𝐮𝐧 𝐌𝐚𝐫𝐤𝐮 (𝐌𝐢𝐥𝐞𝐬𝐭𝐨𝐧𝐞𝐬) 𝐛𝐚 Á𝐫𝐞𝐚 𝐗𝐚𝐯𝐞

Bazeia ba proposta Governu RDTL, sei realiza estudu inisiu hodi haree kondisaun reál iha servisu no forma estrutura asisténsia téknika iha área haat (4) tuirmai ne'e:

• Reforma Tributária: Foku ba buka hatene nesesidade reál hodi hadi'a servisu Autoridade Tributária no formasaun/sertifikasaun rekursu umanu iha área impostu nian.

• Jestaun Patrimóniu Estadu: Estudu inisiu sei prodús relatóriu ne'ebé sai baze hodi identifika nesesidade ba sistema kontrolu patrimóniu ne'ebé modernu liu.

• Jestaun Dívida Estadu: Analiza sistema kontrolu dívida estadu/públiku hodi formula forma asisténsia téknika ne'ebé adekuadu.

• Parseria Públiku-Privadu (PPP): Ajuda ekipa peritu sira hodi identifika nesesidade reforma no kontinua forma modelu asisténsia téknika ba períodu 2026-2027.

𝐅𝐨𝐧𝐭𝐞𝐬 𝐅𝐢𝐧𝐚𝐧𝐬𝐢𝐚𝐦𝐞𝐧𝐭𝐮 𝐧𝐨 𝐊𝐨𝐨𝐩𝐞𝐫𝐚𝐬𝐚𝐮𝐧 𝐓é𝐤𝐧𝐢𝐤𝐚

Atu garante susesu ba programa reforma ida-ne'e, atividade sira hetan suporta finanseiru husi fonte rua:

1. Orsamentu Jerál Estadu (OJE): Alokasaun orsamentu reforma sistema kontabilístika iha Dotasaun Jerál Estadu (DJE) ho montante US$ 300,000 hodi responde ba despeza operasionál hanesan alojamentu, transportes, catering, ajudas de kusto, no servisu profisionál sira.

2. Orsamentu husi Indonesian AID: Tuir proposta, DJT propoin apoiu orsamentu ba atividade reforma iha RDTL ba tinan 2026 ho montante US$ 38,350.00, foku liu ba catering no servisu profisionál sira.

𝐊𝐨𝐦𝐩𝐨𝐳𝐢𝐬𝐚𝐮𝐧 𝐄𝐤𝐢𝐩𝐚 𝐏é𝐫𝐢𝐭𝐮

Implementasaun atividade sira-ne'e sei hetan akonpañamentu husi Ekipa Péritu hosi Governu Indonézia (DJP no DJKN) ne'ebé kompostu hosi ema na'in-6 ba área Reforma Tributária no ema na'in-6 ba área Jestaun Patrimóniu Estadu.

Atu serbisu hamutuk ho ekipa peritu hirak ne'e, Governu RDTL (liuhusi Autoridade Tributária, Diresaun Jerál Tezouru, no Diresaun Jerál Jestaun Patrimoniu Estadu, Diresaun Jerál Mobilizasaun Rekursu Externu) sei nomea funsionáriu xave sira hodi asegura servisu preparasaun nian. Siklu nomeasaun ba ekipa péritu husi parte Timor-Leste nian iha deadline atu submete to'o loron 17 Jullu 2026.

Ho pasu estratéjiku hirak ne'e, Governu Timor-Leste hein katak jestaun finanseira estadu nian sei sai efikás, transparente, no tuir padraun globál, hodi kontribui ba dezenvolvimentu sustentável rai-laran.

Tampilkan lebih sedikit