𝗗Í𝗟𝗜, 𝗠𝗝– 𝗦𝗲𝘀𝘁𝗮-𝗳𝗲𝗶𝗿𝗮 𝟭𝟳 𝗝𝘂𝗹𝗹𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, hala'o enkontru ho Enkaregadu Negósiu Embaixada Estadu Unidus Amérika (EUA) iha Timor-Leste, Bruce R. Begnell, hodi ko'alia no hametin relasaun kooperasaun bilateral entre nasaun rua iha área justisa, iha Embaixada Estadus Unidos Amérika, Praia dos Coqueiros, Díli.

Objetivu hosi enkontru ne'e, atu reforsa no habelar tan kooperasaun entre Governu Timor-Leste no Governu Estadu Unidus Amerika, liuliu iha setor justisa, ho foku ba promosaun no protesaun direitus humanos, prevensaun no kombate trafiku humanu, no dezenvolvimentu kapasidade ba instituisaun sira ne'ebé servisu iha setor justisa.

Parte rua mós diskute oportunidade atu kontinua fó apoiu ba programa formasaun no kapasitasaun ba autoridade sira iha área investigasaun kriminal, liuliu ba membru sira hosi Polícia Nasional Timor-Leste (PNTL) no Polícia Sientífika ba Investigasaun Kriminal (PCIC).

Ministru Justisa hato'o apresiasaun ba apoiu no kooperasaun ne'ebé Governu Estadus Unidos kontinua fó ba Timor-Leste, no hatete katak kooperasaun ne'e importante tebes atu hametin sistema justisa, promove Estadu de Direitu, no hadi'a asesu sidadaun sira ba justisa.

Enkontru ne'e reflete kompromisu hamutuk hosi Governu Timor-Leste no Governu Estadus Unidos atu kontinua haburas parseiria estratéjika ida ne'ebé fó benefísiu ba dezenvolvimentu setor justisa no hametin instituisaun sira iha Timor-Leste.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝘀𝗶𝘁𝗿𝘂 𝗝𝘂𝘀𝘁𝗶𝘀𝗮 ≠