22 Jullu 2026: Ministériu Saúde (MdS) liu husi Vise-Ministru Fortalesimentu Institusionál Saúde (VMFIS) Sr. José dos Reis Magno Lic.SP. MM, hamutuk ho funsionáriu no Komunidade Selebra Loron Nasionál Saúde ba dala-11, iha Munisípiu Viqueque.

Iha Diskursu VMFIS hatete “Iha oportunidade ida-ne'e, hau hakarak hato'o agradesimentu boot ba povu Viqueque tanba simu ita hotu ho laran luak no kontinua fó apoiu ba MdS atu hadia saúde komunidade, loron ida-ne'e laós deit loron atu halo festa, loron ida-ne'e mak tempu atu ita reflete tempu atu fó rekonesimentu importante liu hotu, tempu atu renova ita hotu nia kompromisu servisu ba saúde povu Timor-Leste (TL).

Ita selebra ema sira ne'ebé dedika sira nia moris tomak atu asegura ema nia saude no salva ema seluk nia moris, ita selebra rezultadu ne'ebé Sistema Nasionál Saúde konsege ona, no reafirma ita nia hakarak atu kontinua harii sistema saúde ida-ne'ebé forte liután, modernu, justu no besik liután ba povu, Tema komemorasaun tinan ida-ne'e mak "Hau nia Tasi, Hau nia Timor ba Hau nia Saúde". Tema ida-ne'e iha signifikadu boot tebes, tasi maka fonte moris, tasi fó ai-han, tasi sustenta ekonomia família sira, tasi mak parte ida husi ita nia identidade nasionál.

Maibé tasi mós parte importante ba ita nia saúde, bainhira ita proteje tasi, ita proteje ai-han ne'ebé ita konsome, bainhira ita proteje bee-matan, mota no ambiente, ita prevene moras barak no garante moris di'ak ba jerasaun oin mai, bainhira ita hamenus poluisaun, hadi'a saneamentu no promove moris saudável, ita investe diretamente ba saúde povu, Saúde la hahú iha ospitál deit, Saúde hahú iha uma, Hahú husi bee-moos, Hahú husi ai-han ne'ebé nutritive, Hahú husi vasinasaun ba labarik sira, Hahú husi kuidadu ba inan isin-rua, Hahú husi ezersísiu, Hahú husi ita nia kuidadu ba ambiente, Hahú bainhira ema ida-idak responsabiliza an atu hadia nia saúde rasik, nia família, nia komunidade no nia rai.

Tanba ne'e, tema tinan ida-ne'e hanorin ita katak promove saúde laos responsabilidade Ministériu Saúde deit, Saúde mak responsabilidade ita hotu ninian, durante tinan balu ikus ne'e, Timor-Leste halo ona progresu importante iha setor saúde, ita halo ona servisu kuidadu saúde primária ita hadia programa vasinasaun, fortalese sistema vijilánsia epidemiolójika, investe iha digitalizasaun servisu saúde, aumenta kapasidade rekursu umanu, promove investigasaun sientífika no inovasaun, kontinua mós hametin instituisaun sira iha setor saúde, tanba instituisaun forte mak garante servisu públiku ne'ebé eficiente, transparente ho kualidade aas.

Tanba MdS valoriza kontribuisaun ema ida-idak, loron ida-ne'e ita halo momentu importante ida, mak entrega Prémiu ba Profisionál Saúde Exemplár, Funsionáriu Exemplár Rejime Jerál no Estabelesimentu Saúde Exemplár, prémiu hirak-ne'e la'ós sertifikadu ka troféu deit, prémiu hirak-ne'e mak rekonesimentu ofisiál husi Estadu ba dedikasaun, méritu, kompeténsia, étika profisionál no servisu di'ak ba povu, Vensedór sira ne'ebé simu rekonesimentu iha loron ida-ne'e hatudu katak, maski iha limitasaun barak, sira hatudu katak servisu ba povu presiza kompeténsia, integridade, disiplina, sakrifísiu no fo laran ba malu hodi ajuda ema seluk.

Ha'u hein katak prémiu hirak-ne'e bele sai motivasaun ba profisionál saúde hotu iha Timor-Leste, kada sentru saúde, postu saúde, ospitál no servisu administrativu buka kontinua hadia nia servisu, IX Governu Konstitusionál sei kontinua komprometidu atu hametin Sistema Nasionál Saúde, Ita sei kontinua inviste iha formasaun rekursu umanu, Iha modernizasaun infraestrutura, transformasaun dijitál, investigasaun sientífika.

Iha boa governasaun, transparénsia, no kualidade servisu saúde, tanba investimentu ba saúde mak investimentu ba dezenvolvimentu nasaun, laiha edukasaun di'ak bainhira labarik sira la saudável, laiha ekonomia forte bainhira traballadór sira la saudável, no laiha dezenvolvimentu sustentável bainhira komunidade sira la iha saúde di'ak, iha loron ida-ne'e, hau hakarak fó apresiasaun espesiál ba profisionál saúde sira ne'ebé servisu iha área remota sira maski hasoru difikuldade barak, imi kontinua servisu ho dedikasaun atu povu bele asesu ba kuidadu saúde.

Atu garante katak ema ida-idak bele asesu ba servisu saúde ne'ebé di'ak ho dignidade, hau hakarak husu ba ita hotu atu kontinua hamutuk harii TL ida-ne'ebé saudável liután, mai ita hamutuk servisu atu ema hotu iha TL bele hetan kuidadu saúde ho kualidade”.

Partisipa iha Loron Nasional ne’e mak Prezidente Autoridade Munisipiu Viqueque, Komandante PNTL Munisipiu Viqueque, Veteranus, CCITL, Estudante, Komunidade no seluk-seluk tan.

#MídiaPalácioDasCinzas

See less