𝗗í𝗹𝗶, 𝟮𝟯 𝗝𝘂𝗹𝗹𝘂 𝟮𝟬𝟮𝟲 – Ministru Komérsiu no Indústria, Sr. Nino Pereira, halo sorumutu ho Prezidente Autoridade Administrativa Atauro, Sr. Mateus Belo, akompaña husi Diretor Unidade Serbisu Deskonsentradu MCI Atauro, Sr. César Aleixo Brandão, iha sala reuniaun Ministru.

Iha sorumutu ne'e, parte rua diskute kona-ba planu Governu, liuhusi Ministériu Komérsiu no Indústria, atu harii Merkadu Munisipál foun ida no Merkadu Fronteira Marítima iha Ilha Atauro. Inisiativa ida ne'e nu'udar parte husi estratéjia Governu atu haforsa infraestrutura komersiál, fasilita atividade komérsiu, no habo'ot oportunidade ekonomia ba komunidade no empreendedór sira iha Atauro.

Durante sorumutu, parte rua mos halo análiza kona-ba posibilidade prinsipál sira ba implementasaun projetu refere, inklui identifikasaun fatin ne'ebé apropriadu no estatutu rai ne'ebé sei uza ba konstrusaun merkadu sira, atu asegura katak prosesu implementasaun bele lao ho di'ak no tuir dispozisaun legal no planeamentu Governu nian.

Alende ne'e, parte rua mos diskute planu atu realiza Atauro Weekly Market, nu'udar feira semanal ida ne'ebé sei fó prioridade ba promosaun no fa'an produtu lokál, nune'e mos habelar oportunidade ba emprezáriu no MSME sira iha Atauro atu promove no komersializa sira-nia produtu.

Feira ne'e mos planeia atu halo koordenasaun ho autoridade kompetente iha Indonézia, liuliu ho ilha sira ne'ebé besik ho Atauro, hodi habelar rede komérsiu transfronteirisu, aumenta oportunidade merkadu ba produtu lokál, no hametin relasaun ekonomia entre komunidade sira iha área fronteira marítima.

𝙈é𝙙𝙞𝙖 𝙈𝘾𝙄

See less