𝟏𝟕 𝐉𝐮𝐥𝐥𝐮 𝟐𝟎𝟐𝟔

==========

Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Dato' Seri Francisco Kalbuadi Lay, hala'o enkontru kortezia ho delegasaun Konsellu Reprezentante Rejionál (DPD-Dewan Perwakilan Daerah) Bali, Repúblika Indonézia, hodi diskute oportunidade sira atu hametin kooperasaun entre Timor-Leste no Bali iha área turizmu, komérsiu, investimentu no promosaun produtu nasionál ba merkadu internasionál.

Delegasaun ne'e lideradu husi Dr. Shri I Gusti Ngurah Arya Wedakarna Mahendradatta MWS III, Senadór Konsellu Reprezentante Rejionál Repúblika Indonézia (MPR RI- Majelis Permusyawaratan Rakyat Republik Indonesia) ba Provínsia Bali, no kompostu husi reprezentante sira husi Kamar Dagang dan Industri-KADIN Bali, Governu Inspetoria Bali, Kooperativa Sukla Satyagraha Indonesia, Kooperativa Arak Semeton Bali, Indústria Alimentár Bali, Asosiasaun Empregadores Indonézia (APINDO) Bali, instituisaun bankáriu no finanseiru, reprezentante setór privadu, no asesór peritu sira.

Iha enkontru ofisiál ne'e, oinsa atu troka hanoin kona-bá estratéjia atu promove poténsia turístika Timor-Leste no haburas promosaun ba produtu lokál sira, atu bele asesu ba merkadu internasionál liuhusi rede negósiu no kooperasaun ho Bali. Diskusaun mós fó atensaun ba oportunidade atu haburas investimentu no dezenvolve setór sira ne'ebé bele fó benefísiu ba ekonomia rai-rua.

Delegasaun DPD Bali afirma sira-nia prontidaun atu apoia Timor-Leste iha promosaun turizmu, komérsiu no investimentu, inklui fasilita introdusaun ba merkadu internasionál ba produtu Timor-Leste nian no hamosu oportunidade ba emprezáriu sira atu halo parseria ho investidór no negósiu sira iha Bali.

Durante enkontru ne'ebé hala’o iha Gabinete Vise-PM, Farol, Díli, Sesta, 17 Jullu 2026, delegasaun ofisialmente konvida Vise-PM atu partisipa iha Bali-Timor-Leste Business Forum 2026, ne'ebé sei realiza iha Bali iha tempu besik. Fórum refere sei sai plataforma importante atu hametin relasaun ekonomia no komérsiu entre Bali no Timor-Leste, no loke oportunidade foun ba investimentu, kooperasaun emprezariál.

Objetivu prinsipál husi vizita delegasaun mak halo enkontru ho Vise-Primeiru-Ministru, akompaña preparasaun ba Bali-Timor-Leste Business Forum 2026, hametin relasaun bilaterál entre Bali no Timor-Leste, esplora oportunidade kooperasaun iha komérsiu no investimentu, no haburas parseria iha área turizmu, agrikultura, peska no indústria ai-han.

Delegasaun mós hato'o interese atu dezenvolve kooperasaun iha área kooperativa no empoderamentu UMKM (Empreza Mikro, Ki'ik no Médiu), indústria alimentár, indústria bebida alkólika ne'ebé hetan lisensa, enerjia renovável, ekonomia kriativu, artezanatu no mobiliáriu, teknolojia dijitál, edukasaun, no fasilitasaun finansiamentu ba projetu kooperasaun sira liuhusi instituisaun bankáriu no finanseiru.

Iha okaziaun, Vise-PM, MKAE no MTA, Dato' Seri Francisco Kalbuadi Lay, apresia ho vizita no inisiativa husi Delegasaun DPD Bali, hodi afirma katak, Governu Timor-Leste sei kontinua loke-an ba parseria ho parseiru sira iha rejiaun, atu hasa'e kompetitividade ekonomia nasionál, promove turizmu sustentável, aumenta eksportasaun produtu Timor-Leste no atrai investimentu ne'ebé bele kria empregu no fó benefísiu ba povu Timor-Leste.

See less