𝟐𝟎 𝐉𝐮𝐥𝐥𝐮 𝟐𝟎𝟐𝟔

==========

Vise-Primeiru-Ministru,Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, lidera enkontru ho Prezidente ASPEA (Asosiasaun Portugeza ba Edukasaun Ambientál) no Koordenadór Jerál bá Redeluso ( Rede Luzófona ba Edukasaun Ambientál), Joaquim Ramos Pinto, iha vizita kortezia ida no aprezentasaun kona-bá misaun koordenasaun nasionál ba preparasaun Kongresu Internasionál Edukasaun Ambientál ba nasaun sira Comunidade dos Países de Língua Portuguesa (CPLP) ba Dala IX, ne'ebé sei hala'o iha Jullu 2027 iha Oecusse.

Nune'e iha loron 21 Jullu 2026, Governu Timor-Leste ho reprezentante husi Portugal sei halo lansamentu ba atividade pré-kongresu nian ne'ebé sei hala'o iha Centro de Convenções de Díli.

Enkontru ne'e hala'o iha Gabinete Vise-PM, Farol, Díli, Segunda, 20 Jullu 2026, ho objetivu hodi haforsa kooperasaun entre Governu Timor-Leste no parseiru sira iha área edukasaun ambientál, sustentabilidade no dezenvolvimentu sustentável.

Iha diskusaun ne'e, Prezidente ASPEA, Joaquim Ramos Pinto aprezenta planu misaun no objetivu Kongresu Internasionál Edukasaun Ambientál, ne'ebé hakarak hametin kooperasaun entre nasaun membru CPLP sira hodi promove edukasaun ambientál, troka esperiénsia no dezenvolve estratéjia konjunta atu responde ba dezafiu ambientál iha futuru.

Governu liuhusi Vise-PM, MKAE no MTA, Dato' Seri Francisco Kalbuadi Lay, hatete, Governu iha kompromisu atu apoia inisiativa sira ne'ebé promove konservasaun ambiente, edukasaun no dezenvolvimentu sustentável, tanba área hirak ne'e importante ba futuru Timor-Leste no komunidade CPLP tomak.

“Enkontru ne’e hodi prepara ba Kongresu Internasionál Edukasaun Ambientál ba nasaun sira Comunidade dos Países de Língua Portuguesa,”dehan Vise-PM hodi kontinua katak, kooperasaun ne'e bele kontribui ba susesu Kongresu Internasionál Edukasaun Ambientál no hametin papél Timor-Leste iha promosaun sustentabilidade no kooperasaun iha komunidade CPLP.

Nune’e mós, Prezidente ASPEA no Koordenadór Jerál bá Redeluso, Joaquim Ramos Pinto, hatete, enkontru ho autoridade Timor-Leste ba kooperasaun no atu servisu hamutuk hodi hametin liután lasu amizade no polítika sira edukasaun ambientál nian.

“Obrigadu barak, Sua Exelénsia, ba oportunidade ida-ne'e, ba vizita kortezia ida-ne'e. Sempre sai prazér boot ida. Ami koñese malu tiha ho Ita-boot iha Lisboa, no hodi loron ida-ne'e iha ne'e ba dala primeiru, tanba ha'u iha vontade bo’ot kleur ona, tinan barak nia laran, atu to'o, no ain-hakat ba Timor-Leste ba kooperasaun no atu ita servisu hamutuk no hametin liután lasu amizade ida-ne'e no polítika sira edukasaun ambientál nian.

Timor-Leste hakat daudaun atu aplika iha ámbitu ambiente no edukasaun ambientál nian. Ha'u hakarak dehan katak, ami rekoñese importánsia ne'ebé Governu ida-ne'e, ne'ebé lidera husi Sua Exelénsia Vise-Primeiru-Ministru, atu integra ambiente, pasta ambiente nian hamutuk ho nia, hamutuk ho Turizmu, no atu dehan katak, husi ne'e, iha dalan ida ne'ebé la'o daudaun no dezenvolve, no to'o iha momentu kandidatura Timor-Leste nian ba Kongresu Internasionál Dala IX Edukasaun Ambientál nian, ne'ebé sei realiza iha meadu Jullu 2027 iha Oecusse, maibé mós iha rejiaun ne'e iha Díli, ho atividade sira pré-kongresu nian.

Atu hato'o mós mensajen ba Señór Vise-Primeiru-Ministru kona-bá importánsia husi Estratéjia Nasionál Edukasaun Ambientál nian; hato'o ba nia katak foti mós kestaun ne'e iha meza-kabuar ministru sira Ambiente nian husi CPLP, ho relevánsia husi estratéjia no polítika edukasaun ambientál nian; husik hela dezafiu ida-ne'e atu nune'e, iha prosesu konstrusaun Kongresu Internasionál Dala IX Edukasaun Ambientál nian husi País no Komunidade Lian Portugés (CPLP) nian, bele hanoin ho laran-di'ak ba medida polítika ida-ne'e hamutuk ho parseiru sira Governu nian, tanba ne'e mós polítika transversál ida, edukasaun ambientál ne'e, no ita presiza atu nune'e ita bele hakat no hateke ba b oin, krize oioin ida-ne'e, lakon biodiversidade, menus rekursu sira, asaun klimátika no krize klimátika,”dehan Joaquim.

Enkontru ne'e mós hetan akompañamentu husi Prezidente Autoridade Turizmu Timor-Leste, Virgílio Smith, Koordenadór Jerál Ambiente, Alves Gomes Martins, Diretór Jerál ba Ambiente, Carlos Ximenes, no Diretora Sentru Edukasaun no Informasaun Ambientál, Elisa Luisa Santa Pereira.

See less