Singapura, 22 Jullu 2026 – Ministra Edukasaun Timor-Leste, Dra. Dulce de Jesus Soares, partisipa iha Kuórum Internasionál Edukasaun ASEAN, ne’ebé hala’o iha otél Shangri-La, Singapura.

Ministra akompaña husi delegasaun Timor-Leste kompostu husi Diretora-Jerál Planeamentu, Polítika, Inkluzaun no Informátika (DG-PPII), Dra. Odília das Dores Ung Martins, no Vise-Presidente Institutu Nasionál Formasaun Dosente no Profisionál Edukasaun (INFORDEPE), Sra. Domingas Belo Amaral Mendes.

Kuórum ne’e sai nu’udar plataforma importante ba diálogu no kooperasaun entre nasaun sira membru ASEAN, ne’ebé hamutuk hodi diskute no analiza polítika edukasaun sira ne’ebé iha interese komún, ho objetivu atu promove hadi’a kualidade edukasaun iha rejiaun.

Durante enkontru, partisipante sira diskute kona-ba dezenvolvimentu no implementasaun kurríkulu inovativu no ho kualidade, inklui mós dezenvolvimentu polítika no referénsia komún sira ne’ebé bele kontribui ba hametin sistema edukasaun iha nasaun membru ASEAN.

Tema prinsipál ida-ne’ebé hetan atensaun mak kona-ba utilizasaun Inteliǰénsia Artifisiál (IA) iha prosesu ensinu no aprendizajen.

Partisipante sira fahe esperiénsia no perspetiva kona-ba polítika sira ne’ebé nasaun ida-idak adopta, ho objetivu atu identifika oportunidade no estratéjia ba utilizasaun IA ne’ebé responsavel, inovativu no efetivu iha setór edukasaun.

Iha sorin seluk , Ministra Edukasaun Timor-Leste mós hala’o enkontru bilaterál ho Ministru Edukasaun husi Singapura, Repúblika Koreia, Japaun, Malázia no nasaun sira-seluk, ho objetivu atu hametin relasaun kooperasaun no buka oportunidade foun ba kolaborasaun entre Ministériu Edukasaun Timor-Leste no Ministériu Edukasaun husi nasaun sira-ne’e.

Enkontru bilateral sira-ne’e sai nu’udar oportunidade importante atu diskute área prioridade sira iha kooperasaun edukasaun, inklui dezenvolvimentu kurríkulu, inovasaun edukativa, formasaun manorin sira, transformasaun dijitál no utilizasaun teknolojia foun iha prosesu ensinu no aprendizajen.

Kuórum Internasionál Edukasaun ASEAN tinan ida-ne’e, Singapura sai nu’udar nasaun uma-na’in. Ministériu Edukasaun Singapura responsabiliza ba organizasaun no preparasaun atividade sira iha enkontru ne’e, ne’ebé sai mós oportunidade ida atu hametin diálogu, kooperasaun no kompromisu hamutuk entre nasaun sira partisipante, hodi promove hadi’a kualidade edukasaun iha rejiaun.

#MédiaME